בס"ד

נייע רעוואלוציאנערע טעכנאלאגיע: אומבאמאנטע שיפן וועלן קענען ארויסשיקן און צוריקנעמען קלענערע שיפלעך אינמיטן ים אן קיין מענטשליכע הילף

א נייע מדינת ישראל-אנטוויקלטע טעכנאלאגיע צייגט וויאזוי אומבאמאנטע שיפן קענען ארויסשיקן, צוריקנעמען און טראגן קלענערע שיפלעך, אן דעם וואס עס זאל זיך פאדערן סיי וואספארא מענטשליכע אריינמישונג אויפן דעק.

די סיסטעם, וואס ווערט אנגערופן ALARS (אויטאנאמישע ארויסשיק און צוריקנעם סיסטעם), איז אנטוויקלט געווארן דורך די מדינת ישראל קאמפאני 'סילארטעק' (Sealartec) אין א געמיינזאמע פראדזשעקט מיט די אמעריקאנער פירמע 'מארטאק' (MARTAC). די טעכנאלאגיע ערלויבט פאר א גרעסערע אומבאמאנטע שיף, די 'דעוויל רעי T38', צו אויטאמאטיש כאפן, ארויפלאדן און באפעסטיגן א קלענערע 'מאנטאס' (MANTAS) שיפל בעת ביידע געפינען זיך אינמיטן ים.

אין א דעמאנסטראציע ווידעא וואס איז ארויסגעשטעלט געווארן, זעט מען ווי די גרעסערע שיף שטעלט זיך אין פאזיציע צו פאנגען דאס קלענערע שיפל, און ענדיגט דעם גאנצן פראצעס פון עס ארויפציען און באפעסטיגן אן קיין שום טראדיציאנעלע קעיבלס אדער מענטשליכע הילף.

די סיסטעם נוצט א ספעציעלע 'לאקאלע פאזיציאנירונג סיסטעם' (LPS) פון סילארטעק, וואס גיט פונקטליכע רעאלע-צייט לאקאציעס צו קאארדינירן די שיפן דורכאויס דעם פראצעס. לויט די קאמפאניס, קען די טעכנאלאגיע ארבעטן אפילו אין שטורמישע וואסערן ביז 'סי סטעיט 4' (Sea State 4), וואס טוט שטארק פארברייטערן די אומשטענדן אונטער וועלכע אזעלכע אפעראציעס קענען דורכגעפירט ווערן.

די נייע טעכנאלאגיע איז א לייזונג צו א גרויסע אפעראציאנעלע פראבלעם מיט וואס די נעיווי פלאטעס פלאגן זיך: וויאזוי ארויסצושיקן און צוריקנעמען קלענערע שיפלעך אויף א זיכערן אופן, אן דעם וואס מענטשן זאלן דארפן דורכפירן די געפארפולע ארבעט אינמיטן ים.

דורך דעם וואס די גרעסערע שיפן קענען דינען ווי אן אויטאנאמישע "מאדער-שיף" (mothership), קען די ALARS סיסטעם ארויסהעלפן צו קאארדינירן א גאנצע שווארעם פון שיפלעך, פארלענגערן די צייט פון מיסיעס, און געבן פאר די נעיווי אפערירער א גרעסערע פלעקסיביליטי צו נוצן עטליכע אומבאמאנטע פלאטפארמעס איבער א ברייטערע שטח.

די מאדולארע סיסטעם קען אויך צוגעפאסט ווערן פאר אנדערע אומבאמאנטע סיסטעמען, וואס מיינט אז עס וועט קענען גענוצט ווערן פאר פיל מער ווי נאר די ספעציפישע 'מאנטאס' שיפלעך וואס מען זעט אין די ווידעא.

מארטאק און סילארטעק האבן אפיציעל פארגעשטעלט די נייע געמיינזאמע טעכנאלאגיע אין פעברואר 2025, און האבן עס באצייכנט אלס א ריזיגע שריט פאראויס צו האבן פלאטעס וואס קענען דורכפירן קאמפליצירטע מיסיעס מיט ווייניגער אנגעוויזנקייט אויף מענטשן. די אנטוויקלונג שטרייכט אונטער וויאזוי די מדינת ישראל אינזשענירינג און אמעריקאנער מאריטים טעכנאלאגיע טוען אינאיינעם ביישטייערן צו די עוואלוציע פון אויטאנאמישע נעיווי אפעראציעס, וואו שיפן קענען זיך אליינס ארויסשיקן, צוריקקומען און זיך שטיצן איינע די אנדערע, אפילו ווען זיי זענען גאר ווייט אוועק פון זייערע מענטשליכע קאנטראלירער.