די איראנער 'פארס' נייעס אגענטור, וועלכע איז אפיליאירט מיט די רעוואלוציאנערע גווארדיע (IRGC), האט ארויסגעשטעלט א באריכט אז טעהראן'ס קרעפטן האבן געצילט און אטאקירט 19 קאמערציאלע שיפן אין לויף פון צוויי נאכאנאנדיגע נעכט אינעם סטראטעגישן 'הארמוז דורכגאס'. לויט זייערע טענות, האבן די שיפן גענוצט אומאויטאריזירטע רוטס אינעם קריטישן וואסער-וועג.

לויט דעם באריכט, זענען 12 שיפן געווארן אטאקירט די ערשטע נאכט, און נאך 7 שיפן די קומענדיגע נאכט פון סעפטעמבער 26. די איראנער סטעיט מידיא לייגט עס אראפ אלס אן ענפארסמענט שריט קעגן שיפן וואס איגנארירן טעהראן'ס אנווייזונגען. 'פארס' באריכטעט אז די אטאקעס האבן זיך געצויגן אריין אינעם קומענדיגן טאג, ווען איראן האט לויט באריכטן ארויסגעשאסן קרוז מיסילס און זעלבסטמארד דראונס פון אירע דרום ראיאנען אויף קאמערציאלע שיפן. דערווייל איז נאך נישט באשטעטיגט געווארן פון אומאפהענגיגע קוועלער ווער די אייגנטומער פון די אטאקירטע שיפן זענען.

די פרישע קלעימס קומען נאך חדשים פון אנגעצויגנקייט אינעם הארמוז דורכגאס, וואס איז איינע פון די וועלט'ס וויכטיגסטע קארידארן פאר אויל טראנספארטאציע. איראן האט שוין עטליכע מאל געווארנט אז שיפן וואס פארן אדורך אן זייער ערלויבעניש טוען דאס אויף זייער אייגענע ריזיקע. פריערדיגע אינצידענטן אין דעם דורכגאס דאס יאר האבן אריינגערעכנט מיסיל און דראון אטאקעס אויף קאמערציאלע שיפן, דאס פלאצירן ים-מינעס, און דאס פארכאפן אמעריקאנער אומבאמאנטע אונטערוואסער פלאטע מאשינען. דאס אלעס קומט אין שאטן פונעם אנגייענדן קאנפליקט צווישן איראן, מדינת ישראל און די פאראייניגטע שטאטן.

ווי ביי פילע אנדערע איראנער טענות אין צייט פון קריג, קומען די באריכטן פון סטעיט-קאנטראלירטע מידיא און זענען דערווייל נישט באשטעטיגט געווארן דורך אומאפהענגיגע מאריטים זיכערהייט פירמעס, שיפינג קאמפאניס, אדער מערב-וועלט רעגירונגען. נעמענדיג אין באטראכט די וויכטיגקייט פונעם דורכגאס פאר די גלאבאלע אויל סופליי, קען אזא פארנעם פון אטאקעס - אויב עס ווערט באשטעטיגט - ברענגען א פרישע כוואליע פון אינטערנאציאנאלע דרוק אויף איראן, און קען ווייטער שטערן די שוין-אזוי-אויך אנגעצויגענע שיפינג טראפיק אינעם ראיאן.