היסטאריש: פרעזידענט טראמפ מעלדט איבער די פולשטענדיגע ארויסציאונג פון אמעריקאנער טרופן פון איראק

פרעזידענט טראמפ איז מיטוואך ארויסגעטרעטן פארנט פון רעפארטער און געמאלדן די נייעס אויף וואס אמעריקע האט געווארט פאר מער ווי א יארצענדליג: די לעצטע אמעריקאנער טרופן פארלאזן אפיציעל איראק.

"איך בין צופרידן צו מעלדן היינט אז די לעצטע אמעריקאנער קרעפטן פארלאזן איראק," האט טראמפ געזאגט, אנרופנדיג דעם שריט "א זיג פאר אמעריקע, א זיג פאר איראק, און א דעצידירנדע זיג איבער אייסיס, וועלכע איז געווארן פולשטענדיג צעשמעטערט."

די ארויסציאונג צייכנט אפ דעם אפיציעלן ענדע פון די מיליטערישע אפעראציע וואס האט זיך אנגעהויבן צוריק אין 2014 צוריקצושלאגן די אייסיס טעראר גרופע, נאכדעם וואס זיי האבן איינגענומען ריזיגע טיילן פון איראק און סיריע. די לעצטע גרופע פון ארום 1,500 ביז 2,500 אמעריקאנער און קאאליציע זעלנער האבן פארלאזט די 'ארביל' עיר בעיס אין צפון איראק, מיט וואס עס קומט צו אן ענדע די אמעריקאנער מיליטערישע אנוועזנהייט אין לאנד וואס ציט זיך שוין צוריק מער ווי צוואנציג יאר, זינט די אינוואזיע אין 2003.

פענטאגאן באאמטע האבן באשטעטיגט אז די ארויסציאונג איז דורכגעפירט געווארן מיט א פולקאמע סדר, און מען האט נישט איבערגעלאזט קיין איין שטיקל עקוויפמענט אונטער זיך. דער הויפט פענטאגאן ווארטזאגער שאן פארנעל האט עס אנגערופן דער קלימאקס פון א 12-יעריגע קאמפיין וואס האט באזיגט אייסיס אלס אן ארגאניזירטע מיליטערישע סטראשע אינעם ראיאן. פרעזידענט טראמפ האט אויסגענוצט די געלעגנהייט ארויסצוברענגען דעם קאנטראסט צווישן די יעצטיגע מסודר'דיגע ארויסציאונג פון איראק, קעגן די כאאטישע און שטארק-קריטיקירטע ארויסציאונג פון אפגאניסטאן אין 2021.

די פאראנטווארטליכקייט פון אויסראטן די פארבליבענע אייסיס צעלן און איראן-געשטיצטע מיליציעס פאלט יעצט אינגאנצן אויף די איראקע רעגירונג און אירע זיכערהייט קרעפטן, אריינגערעכנט די 'פעשמערגע' כוחות אין צפון. דער איראקער פרעמיער מיניסטער אלי אל-זאידי האט זיך באטייליגט ביי א ספעציעלע צערעמאניע אפצוצייכענען דעם היסטארישן מאמענט, בשעת טראמפ האט געלויבט די נייע איראקע פירערשאפט און דערקלערט אז די לאנגע און טייערע קאפיטל פון די איראקע מלחמה קומט ענדליך צו א שלוס.