קובא גרייט זיך אויף א מעגליכע מיליטערישע אטאקע; פרעזידענט מעלדט איבער אקטיוויזירן קריגס-צושטאנד סטרוקטורן

דער קובאנער פרעזידענט, מיגעל דיאז-קאנעל, זאגט אז זיין לאנד פארשטארקט זייערע צוגרייטונגען זיך צו קענען קעגנשטעלן א מעגליכע אויסלענדישע מיליטערישע אטאקע. לויט ווי די קובאנער סטעיט צייטונג 'גראנמא' באריכטעט, האט דער פרעזידענט געמאלדן דעם 13'טן נאוועמבער אז די רעגירונג האט אקטיוויזירט קריגס-צושטאנד סטרוקטורן אפילו יעצט אין פרידנס-צייטן, און מען ארבעט אריינצולייגן מער כוחות צוצוגרייטן ציווילע בירגער פאר פארטיידיגונג.

דער פלאן גייט אין איינקלאנג מיט קובא'ס "מלחמה פונעם גאנצן פאלק" דאקטרינע, וואס פארלאזט זיך נישט בלויז אויף די געהעריגע מיליטער, נאר אויך אויף רעזערוויסטן, לאקאלע פארטיידיגונגס איינהייטן און פשוט'ע בירגער. דיאז-קאנעל האט קלארגעשטעלט אז קובא איז אנטשלאסן צוריקצושלאגן סיי וועלכע מיליטערישע אגרעסיע. פריער דעם חודש האט דאס לאנד אפגעראכטן איר נאציאנאלע "מאנקאדא 2026" מיליטערישע איבונג. די ווידעא קליפס וואס זענען געוויזן געווארן מיט דעם באריכט זענען פון מיליטערישע איבונגען וואס זענען פארגעקומען דעם זומער.

די אנגעצויגנקייט צווישן האוואנא און וואשינגטאן איז שוין הויך דורכאויס דעם גאנצן יאר, זינט די אמעריקאנער אפעראציע וואס האט געכאפט דעם ווענעזועלער פירער ניקאלאס מאדורא אין יאנואר, ווי אויך אן אמעריקאנער אויל בלאקאדע וואס האט פיל ערגער געמאכט קובא'ס ענערגיע און עקאנאמישע קריזיס. באריכטן געבן אן אז פרעזידענט טראמפ האט נישט אויסגעשלאסן א מעגליכקייט פון א באגרעניצטע מיליטערישע אפעראציע אין קובא, און אין אפריל האט די 'יו-עס-עי טודעי' באריכטעט אז די פענטאגאן האט שטילערהייט פארשטארקט אירע פלענער.

עס איז דערווייל נישט פארהאן קיין שום אפיציעלע מעלדונג פון אמעריקע איבער אן אינוואזיע, אדער באווייזן אז אזא זאך קומט בקרוב. קובאנער באאמטע זאגן אז זייער דאקטרינע איז ריין פארטיידיגונג און אז קובא שטעלט נישט פאר קיין שום סכנה פאר די פאראייניגטע שטאטן. דיאז-קאנעל האט צוגעגעבן אז קובא איז אפן פאר געשפרעכן, בתנאי אז עס קומט פאר אן קיין דרוק. די גרויסע פראגע איז יעצט צי די מלחמה רעטאריק איז בלויז א ווארענונג אפצושרעקן וואשינגטאן, אדער א צייכן אז אן אמת'ע קאנפראנטאציע רוקט זיך נענטער.