שרעקעדיגע מאמענט: אמעריקאנער סאלדאטן כאפן א בילד נעבן אן עף-35 פייטער דזשעט ווען די ענדזשין צינדט זיך פלוצלינג אן

א גרופע אמעריקאנער סאלדאטן האבן זיך געשטעלט כאפן א בילד נעבן די ענדזשין פון אן עף-35 (F-35) פייטער דזשעט, ווען פלוצלינג האט זיך די ענדזשין אנגעצינדן. וואס האט אויסגעזען ווי א רוטינע בילד פאר אנדענק, האט זיך אין א סעקונדע פארוואנדלט אין א שרעקעדיגע מאמענט וואס האט איבערגעלאזט אסאך פראגעס.

די עף-35 ווערט געטריבן דורך איין איינציגע 'פרעט ענד וויטני F135' טורבא-פען ענדזשין, וואס איז גאר א מעכטיגע מאטאר געבויט ספעציעל פאר איינע פון די מערסט פארגעשריטענע פייטער דזשעטס אין די וועלט. דערווייל זענען נאכנישט באשטעטיגט געווארן די גרונטליכע דעטאלן, אריינגערעכנט וואו און ווען דאס האט פאסירט, און צי איינער איז חלילה פארוואונדעט געווארן.

אן אנגעצינדענע דזשעט ענדזשין קען זיין גאר געפארפול פאר סיי ווער עס שטייט אין די נאנט, און דאס איז די סיבה פארוואס די 'גראונד קרו' האלט זיך געווענליך אין א שטרענגע ווייטקייט בשעת'ן אנצינדן און אפערירן דעם פליגער. דאס מאכט דעם אינצידענט נאך מער אינטערעסאנט און שרעקעדיג, וויבאלד די סאלדאטן זענען געשטאנען ממש הארט נעבן די ענדזשין ווען עס האט אנגעהויבן ארבעטן.

עס בלייבן נאך אסאך פראגעס איבער פארוואס די ענדזשין האט זיך אנגעצינדן, צי עס איז געווען א געפלאנטע טעסט אדער א טשעק-אויף, ווער עס האט עס אפערירט, און צי די סאלדאטן האבן בכלל געוואוסט אז דאס קען פאסירן. קיין אפיציעלע סטעיטמענט איז נאכנישט ארויסגעגעבן געווארן, און מען ווארט אויף קלארע דעטאלן פון די מיליטער בעפאר מען קען ציען סיי וועלכע מסקנות.