אוזבעקיסטאן האט דעם ענדע וואך אויפגעדעקט איינע פון אירע מערסט-געהיטענע מיליטערישע סודות, ווען זיי האבן אפיציעל באשטעטיגט אז זיי האבן איינגעקויפט די פארגעשריטענע כינעזער 'J-10CE' פייטער דזשעטס. די אנטפלעקונג איז פארגעקומען דורכאויס די נאציאנאלע פייערונגען אפצוצייכענען דעם 35'סטן יארטאג פון לאנד'ס זעלבסטשטענדיגקייט, וואס איז געווארן טראנסמיטירט אויף די סטעיט טעלעוויזיע.

די רעגירונג'ס נייעס אגענטור האט געוויזן ווידיאו בילדער ווי זעקס פון די נייע דזשעטס לאנדן אינעם 'קארשי-כאנאבאד' עיר-בעיס, וואס צייכנט אפ דאס ערשטע מאל וואס די רעגירונג אין טאשקענט גיט אפיציעל צו אז זיי פארמאגן די עראפלאנען. דער אוזבעקיסטאנער פרעזידענט, שאווקאט מירזאיאיעוו, איז געווען אנוועזנד ביי די צערעמאניע, וואו די דזשעטס האבן באקומען א טראדיציאנאלע 'וואסער-קאנאן' סאלוט - א צערעמאניע וואס ווערט געווענליך גענוצט אפצוצייכענען א וויכטיגע מיליטערישע אריוואל.

די אפיציעלע באשטעטיגונג לייגט אן עק צו מער ווי א יאר פון שפעקולאציעס ארום דעם איינקויף. ביז איצט זענען בלויז ארומגעפארן אומאפיציעלע בילדער און קלאנגען איבער די עראפלאנען, אן קיין שום אפיציעלע ווארט פון אוזבעקיסטאן אדער כינע. איינע פון די זעקס דזשעטס וואס מ'האט געזען האט געהאט די נומער 1014 אויפ'ן וויידל, און מ'האט אויך געקענט זען א ספעציעלע פלאץ אנגעגרייט פאר די אוזבעקיסטאנער פאן.

לויט אומבאשטעטיגטע באריכטן, האט אוזבעקיסטאן מעגליך באשטעלט א סך-הכל פון 24 אזעלכע פייטער דזשעטס, כאטש קיין איין רעגירונג האט דאס נאכנישט באשטעטיגט. אלע זעקס עראפלאנען וואס מ'האט געזען אויפ'ן ווידיאו האבן אויך געטראגן עקסטערע פיועל טאנקען וואס ערלויבט זיי צו פליען אויף לענגערע שטרעקעס.

מיט דעם שריט ווערט אוזבעקיסטאן דאס צווייטע לאנד אין דער וועלט צו קויפן די 'J-10CE' דזשעטס, נאכדעם וואס פאקיסטאן איז געווען דער ערשטער קאסטומער אין יאר 2022, וועלכע נוצט זיי אינאיינעם מיט זייערע אמעריקאנער F-16 דזשעטס. די עראפלאנען, וועלכע ווערן פראדוצירט דורך די כינעזער 'טשענגדו עירקראפט קארפאראציע', זענען די מערסט-מאדערניזירטע ווערסיע פון די J-10 פראגראם, און קומען אויסגעשטאט מיט פארגעשריטענע ראדאר סיסטעמען און מאדערנע טעכנאלאגיע. אן אינטערעסאנטע דעטאל איז, אז די דזשעטס וואס זענען אנגעקומען קיין אוזבעקיסטאן האבן נישט די רערן וואס פעלט זיך אויס צו קענען אנפילן ברענשטאף אינמיטן פליען (mid-air refueling), ווארשיינליך וויבאלד דאס לאנד פארמאגט דערווייל נישט קיין עראפלאנען וואס קענען טון דעם דזשאב אין דער לופטן.

דער מאסיווער איינקויף צייגט אויף א גרויסע טויש אין אוזבעקיסטאן'ס מיליטערישע סטראטעגיע, בעת דאס לאנד ארבעט ארויסצוזען אירע אלטע סאוועטישע 'מיג-29' און 'סו-27' פייטער דזשעטס, און זיי טוישן מיט מער מאדערנע געווער. עס שפיגלט אויך אפ כינע'ס וואקסנדע איינפלוס אינעם אינטערנאציאנאלן געווער-מארק, ספעציעל אין צענטראל-אזיע, וואו כינעזער וואפן קאנקורירט שטארק מיט די עלטערע רוסישע סיסטעמען. כינע זוכט יעצט פרישע קונדן, און באריכטן געבן אן אז באנגלאדעש האלט שוין גאר נאנט צום ענדיגן אן ענליכע דיעל צו קויפן די זעלבע עראפלאנען.

פאר אוזבעקיסטאן איז די פובליק אנטפלעקונג נישט בלויז א שריט פאראויס אין מאדערניזירן זייער מיליטער, נאר אויך א קלארע מעסידזש איבער וואו זייערע לאנג-טערמין מיליטערישע שותפות'ן גייען.