סודאן: רעגירונגס קרעפטן פייערן נאכן אראפשיסן א טייערע כינעזער דראון פון די רעבעלן

גרויס פרייד האט אויסגעבראכן אין די מדבריות פון צפון קארדאפאן אין סודאן, נאכדעם וואס די סודאנעזע מיליטער האט סוקסעספול אראפגעשאסן אן "FH-95" (אויך באקאנט אלס CH-95) באוואפנטע דראון, וואס באלאנגט צו די "RSF" רעבעלן קרעפטן. דער אינצידענט איז פארגעקומען דעם 24'סטן סעפטעמבער 2026 העכער די שטאט אל-קאקייטי.

אין א ווידעא וואס צירקולירט פון די סצענע קען מען זען ווי די זעלנער אין זייערע קאמופלאזש יוניפארמס זאמלען זיך ארום די ברענענדיגע חורבות פונעם דראון, בשעת שווארצע רויך הייבט זיך צום הימל. די זעלנער קענען געזען ווערן שרייען פון עקסטאז, ווייזן מיט די פינגער און כאפן בילדער מיט זייערע סעלפאונס.

דער FH-95 איז א כינעזער-געמאכטע דראון וואס קען פליען פאר מער ווי א גאנצע טאג אין א ציה. עס איז געווארן די הויפט וואפן פאר די RSF רעבעלן דורכצופירן אטאקעס טיף אריין אין די טעריטאריעס וואס זענען אונטער די קאנטראל פון די רעגירונג. דאס אראפשיסן אזא דראון, און נאך דערצו עס כאפן אויף קאמערע, ווערט באטראכט ווי א ריזיגע געווינס פאר די רעגירונגס מיליטער, וועלכע ליידן לעצטנס שטארק פון די ווייט-גרייכנדע אטאקעס.

דער יעצטיגער סוקסעס איז א טייל פון א ברייטערע בילד. זינט יוני 2026 האבן די סודאנעזע קרעפטן שוין עטליכע מאל באוויזן אראפצושיסן די סארט דראונס איבער צפון קארדאפאן, אריינגערעכנט נעבן שטעט ווי בארא, על אובעיד, און לענגאויס די וויכטיגע הייוועי וואס פארבינדט דעם ראיאן צום איבריגן טייל פונעם לאנד.

יעדע אזא סוקסעס קאסט אפ פאר די רעבעלן א שווערע פרייז, וויבאלד די סארט דראונס ווערן געשאצט צו קאסטן אין די מיליאנען דאלארן. דערצו נעמט עס צו פון זיי א וויכטיגע געצייג וואס זיי נוצן צו אטאקירן ברענשטאף סטאנציעס, עלעקטריק פלענטס און אנדערע אינפראסטרוקטור ווייט פון די פראנט ליניעס.

די אלגעמיינע ברוטאלע קריג אין סודאן, וואס האט אויסגעבראכן אין אפריל 2023 איבער די קאנטראל פון סטראטעגישע סופליי רוטס, צייגט נישט קיין שום צייכנס פון זיך אפשטעלן. די קאמפן פאר קאנטראל אין די הימלען העכער קארדאפאן איז פארוואנדלט געווארן אין איינע פון די מערסט-נאכגעפאלגטע שלאכטפעלדער אינעם ראיאן.