מדינת ישראל מיליטער באמבארדירט שפיטאל אין כאן יוניס; הויכראנגיקער כאמאס קאמאנדיר צווישן די אומגעקומענע

א מדינת ישראל לופט-אטאקע האט דאנערשטאג אינדערפרי, נאוועמבער 12, געצילט די כירורגישע אפטיילונג פונעם 'נאסער מעדיקעל קאמפלעקס' שפיטאל אין כאן יוניס. לויט פאלעסטינער קוואלן זענען 6 מענטשן אומגעקומען און אמווייניגסטנס 20 אנדערע זענען פארוואונדעט געווארן.

די אטאקע האט געטראפן א געביידע אינעם שפיטאל קאמפלעקס, איבערלאזנדיג שווערע שאדנס צום אפעראציע אפטיילונג און די ארומיגע מעדיצינישע איינריכטונגען. בילדער און ווידעאוס פונעם סצענע צייגן חרוב'ע שפיטאל צימערן, צובראכענע עקוויפמענט, און ברוכווארג צעווארפן איבער די קארידארן, בשעת פארוואונדעטע ווערן ארויסגעטראגן פון די חורבות.

צווישן די טויטע געפינט זיך כאלאד סולעימאן אבו אנזא, וועלכער ווערט אידענטיפיצירט דורך מדינת ישראל קוואלן אלס א הויכראנגיקער כאמאס טעראריסט און דער קאמאנדיר פון די כאמאס 'כאן יוניס בריגאדע'. ווי די עזה געזונטהייט באאמטע געבן איבער, איז א לאקאלער דאקטאר, ד"ר ריזק אבו שיירא, אויך צווישן די אומגעקומענע. די פונקטליכע צאל פארוואונדעטע איז נאך אומקלאר, ווען טייל באריכטן געבן אן איבער 20 און אנדערע שאצן עס ביי 28.

דאס מדינת ישראל מיליטער האט רעאגירט זאגנדיג אז זיי האבן דורכגעפירט די אפעראציע קעגן א הויכראנגיקן כאמאס פירער און אנדערע טעראריסטן, אנגעבנדיג אז די טעראר גרופע האט זיך באזעצט און אויפגעשטעלט א מיליטערישע באזע אינעם שפיטאל קאמפלעקס. כאטש אבו אנזא איז געווען דער הויפט ציל פון די אטאקע, האלט דאס מיליטער נאך אינמיטן אויספארשן אויב ער איז טאקע אומגעקומען.

דער 'נאסער מעדיקעל קאמפלעקס' איז פון די איינציגסטע גרויסע שפיטעלער וואס זענען נאך געבליבן אפן אין דרום עזה, און די שווערע שאדנס צום כירורגישן אפטיילונג האט שטארק געשטערט די מעדיצינישע סערוויסעס פאר פאציענטן וואס נויטיגן זיך אין עמערדזשענסי באהאנדלונגען.

אונטער אינטערנאציאנאלע געזעצן זענען שפיטעלער און מעדיצינישע פערסאנאל באשיצט, סיידן די געביידע ווערט גענוצט פאר מיליטערישע צוועקן. דער אינצידענט וועט ווארשיינליך ברענגען פרישע קריטיק און דרוק אויף מדינת ישראל'ס מיליטערישע אפעראציעס אין עזה, אינמיטן די אנגייענדיגע טענות איבער כאמאס'ס באנוץ פון ציווילע אינפראסטרוקטור פאר טעראר.