כינעזער מיליטער צייגט מוסקלען: פארעפנטליכט ווידעא פון קאמפליצירטע אמפיבישע איבונגען אקעגן איבער טייוואן

די כינעזער מיליטערישע מידיא האט ארויסגעשטעלט א ווידעא וואס צייגט א בריגאדע פונעם 73'סטן ארמיי גרופע אינמיטן דורכפירן קאמפליצירטע אמפיבישע "כוואליע-פארמאציע" איבונגען אויפ'ן ים. אין די ווידעא קען מען זען ווי ארמירטע אמפיבישע פארמיטלען פארן אריין פונעם ברעג גלייך אריין אין וואסער אין אן ארגאניזירטע פאראדע-פארמאציע, בעפאר זיי שווימען צוריק ארויס צו די ברעגעס.

די ווידעא איז ארויסגעשטעלט געווארן דעם 10'טן נאוועמבער 2026, אבער עס טראגט נישט קיין דאטום, אזוי אז עס איז אומקלאר פונקטליך ווען און וואו עס איז רעקארדירט געווארן.

די 73'סטע ארמיי גרופע באלאנגט צום כינעזער 'איסטערן טעאטער קאמאנד' און איז באזירט אין די פודזשיען פראווינץ, וואס געפינט זיך ממש אקעגן איבער דעם טייוואן דורכגאס. די כינעזער סטעיט מידיא האט שוין לאנג אראפגעשטעלט די דאזיגע גרופע אלס איינע פון די הויפט קרעפטן וואס וועלן באנוצט ווערן אין פאל פון אן אינוואזיע און לאנדונג אפעראציע אויף טייוואן.

אזעלכע סארט ווידעאס ווערן אפט אנגעקוקט אלס א דערמאנונג איבער די כינעזער מיליטער'ס פאקוס אויף אמפיבישע אטאקעס, אין ליכט פון די אנגעצויגענע זיכערהייט קאנפליקטן ארום טייוואן. אבער עקספערטן ווייזן אן אז אזעלכע איבונגען דורך די ספעציפישע יוניט זענען א רוטינע זאך און ווערן כסדר פובליצירט, און א טרענירונג ווידעא אליין באדייט נאכנישט אז אן אפעראציע איז אויפ'ן שוועל.

די סארט "כוואליע-פארמאציע" איבונגען זענען געצילט צו טרענירן די קרעפטן וויאזוי אריבערצופירן ארמירטע טאנקען פונעם ים ארויף אויף א ברעג אין אן ארגאניזירטע רייע, וואס ווערט פאררעכנט אלס איינע פון די שווערסטע פאזעס אין סיי וועלכע לאנדונג אפעראציע.

עס בלייבן נאך אלס פראגע צייכנס איבער ווען און וואו די ווידעא איז געכאפט געווארן, און וואספארא מעסעדזש - אויב בכלל - בעידזשינג האט געוואלט שיקן מיט'ן עס ארויסשטעלן. דערווייל דינט עס אלס א מאכטפולע דעמאנסטראציע פון די מעגליכקייטן פון א מיליטערישע יוניט וואס זיצט נענטער צו טייוואן ווי כמעט סיי וועלכע אנדערע כינעזער קראפט.