טרעזשערי סעקרעטאר סקאט בעסענט אריבערגעפירט צו א מיליטערישע באזע נאך טויט-דראאונגען פון איראן

וואשינגטאן - טרעזשערי סעקרעטאר סקאט בעסענט האט באשטעטיגט אז ער האט זיך אריבערגעצויגן פון זיין היים אין וואשינגטאן צו א מיליטערישע באזע, נאך אנווייזונגען פונעם 'סיקרעט סערוויס', צוליב טויט-דראאונגען וואס ער האט ערהאלטן פון איראן.

די שריט איז צוערשט באריכטעט געווארן דורכן 'וואל סטריט זשורנאל', און בעסענט האט זיך באצויגן דערצו אין אן אינטערוויו מיט 'סי-ען-בי-סי', וואו ער האט שארף פארדאמט די איראנער פירערשאפט און קלארגעשטעלט אז ער גייט זיך "נישט לאזן אנשרעקן."

ער האט צוגעגעבן אז די דראאונגען קעגן אים און אנדערע קאבינעט מיטגלידער צייגט אז וואשינגטאן'ס דרוק קאמפיין אויף טעהראן - וואס די אדמיניסטראציע רופט "אפעראציע עקאנאמישע אויסוואורף" - ארבעט גוט. ער האט אראפגעמאלן די איראנער רעוואלוציאנערע גווארדיע אלס א "געפארפולע חיה וואס איז פארשטופט אין א ווינקל" און געפינט זיך אונטער א שווערע פינאנציעלע דרוק.

דער 'ניו יארק טיימס' האט באריכטעט אז אמווייניגסטנס א האלבער דוזן הויכראנגיקע באאמטע האבן זיך אריבערגעצויגן צו מיליטערישע באזעס אדער פארזיכערטע הייזער אינעם פארגאנגענעם יאר צייט צוליב ענליכע זיכערהייט זארגן.

בעסענט האט אויך באשולדיגט דעם 'וואל סטריט זשורנאל' פארן זיין א טייל פון די פראבלעם, זאגנדיג אז די צייטונג האט פובליצירט א בילד מיט די פונקטליכע לאקאציע פון זיין נייע היים אין דזשארדזשטאון דעם זעלבן טאג וואס ער האט עס געקויפט, טראץ וואס זיין טיעם האט זיך געבעטן ביי זיי עס נישט צו טון.

א קוואל האט איבערגעגעבן פאר 'רויטערס' אז די זיכערהייט זארגן זענען געשטיגן נאכדעם וואס דער זשורנאל האט פובליצירט א בילד פון די לופטן פון די 12.5 מיליאן דאלערדיגע פראפערטי, וואס בעסענט האט געקויפט קורץ נאך זיין באשטעטיגונג אין סענאט. די פונקטליכע דעטאלן פון די איראנער דראאונגען זענען נישט פובליצירט געווארן, אבער די עפיזאד צייגט וויאזוי די קאנפראנטאציע מיט איראן גרייכט שוין אריין אין די טעגליכע לעבנס פון הויכראנגיקע אמעריקאנער באאמטע, און איז מער נישט באגרעניצט צום הארמוז דורכגאס אדער צום שלאכטפעלד.