שפאנונג אין מיטל מזרח: מדינת ישראל באטראכט מעגליכקייט פון פרישע אטאקעס אויף איראן אין שאטן פון מאסיווע אמעריקאנער מיליטערישע אנוועזנהייט

מדינת ישראל באטראכט לויט באריכטן די מעגליכקייט פון באנייטע מיליטערישע אטאקעס קעגן איראן, אין די צייט וואס פרעמיער מיניסטער בנימין נתניהו האלט אפ געשפרעכן מיט פאליטישע און זיכערהייט פירער, ווארטנדיג צו הערן די פאזיציע פון וואשינגטאן איבער ווייטערדיגע מיליטערישע שריט.

לויט מדינת ישראל נייעס קוועלער, האבן די געשפרעכן צווישן נתניהו און דעם געוועזענעם צה"ל שעף גדי אייזענקאט זיך קאנצענטרירט אויף איראן'ס מיליטערישע אויפבוי, די מעגליכקייט פון נאך אן אפענסיווע, און ווי ווייט אמעריקע וועט שטיצן אזא אפעראציע. א מדינת ישראל זיכערהייט באאמטער האט אנגעגעבן אז די צוגרייטונגען זענען אין פולן שוואונג און א מיליטערישע אקציע בלייבט א מעגליכקייט, אבער מדינת ישראל ווארט אויף אמעריקע בעפארן גיין פאראויס.

די באריכטעטע צוגרייטונגען קומען אין די זעלבע צייט וואס דער קאמאנדיר פון די אמעריקאנער נעיווי'ס פינפטע פלאטע האט אפגעשטאט א באזוך אין מדינת ישראל איבערצוקוקן די מיליטערישע גרייטקייט און קאארדינאציע אינעם ראיאן.

אינדערצווישן האט די מדינת ישראל 'כאן' נייעס אגענטור באריכטעט אז די אמעריקאנער 'סענטקאם' (צענטראלע קאמאנד) האט געראטן פאר צה"ל פארשטייער זיך צו גרייטן פאר א מעגליכע באנייאונג פון אפעראציעס קעגן איראן, מיט ענליכע ווארענונגען וואס זענען לויט באריכטן איבערגעגעבן געווארן פאר אליאירטע לענדער אינעם גאלף. אבער סענטקאם האט שפעטער שטארק אפגעלייקנט דעם באריכט, זאגנדיג פאר די 'אנאדאלו' אגענטור אז די קלאנגען איבער צוגרייטונגען פאר פרישע מיליטערישע אפעראציעס זענען "בלויזע שפעקולאציעס" און אז עס זענען נישט געווען קיין שום טוישונגען אין די אמעריקאנער מיליטערישע פאזיציעס אינעם ראיאן.

די אומקלארקייט ארום א מעגליכע פרישע אפענסיווע קומט אויך אינאיינעם מיט א דראסטישע טויש אין וואשינגטאן'ס דיפלאמאטישע צוגאנג. וויצע פרעזידענט דזשעי. די. ווענס האט לויט באריכטן פרובירט צו פירן דירעקטע געשפרעכן מיט איראנער באאמטע דורך ראיאנישע פארמיטלער, אבער פרעזידענט דאנאלד טראמפ האט געמאלדן דעם 12'טן נאוועמבער אז אמעריקע דארף נישט נאך אן אפמאך מיט טעהראן, און האט פארארדנט ווענס זיך צו קאנצענטרירן אויף אינערליכע אמעריקאנער אנגעלעגנהייטן. דער באשלוס האט פאקטיש געענדיגט ווענס'ס ראלע אין די פארגעשלאגענע דיפלאמאטישע איניציאטיוו, כאטש וואשינגטאן האלט ווייטער אן די עקאנאמישע און מיליטערישע דרוק אויף איראן.

אין א באזונדערע באריכט האט 'כאן' אנגעגעבן אז ארום 200 אמעריקאנער 'עריעל ריפיולינג' פליגערס זענען סטאנציאנירט געווארן איבערן מיטל מזרח און אייראפע. צווישן די באריכטעטע עירקרעפט קעריערס וואס זענען דעפלאויט געווארן ציילן זיך די 'יו.עס.עס. דזשארדזש וואשינגטאן' און 'יו.עס.עס. דזשארדזש עיטש. דאבליו. בוש', אינדערצייט וואס די 'יו.עס.עס. טעאדאר רוזעוועלט' ווערט ערווארטעט אנצוקומען אינעם אראבישן ים.

אן אפשאצונג פונעם מדינת ישראל 'אינסטיטוט פאר נאציאנאלע זיכערהייט סטאדיס' האט אויך דאקומענטירט צוויי אמעריקאנער עירקרעפט קעריערס וואס האבן אפערירט אינעם אראבישן ים אין די ערשטע וואך פון נאוועמבער, אינאיינעם מיט א מאסיווע נעיווי און לופט שטיצע אנוועזנהייט.

פונדעסטוועגן, דארף מען נישט אויטאמאטיש אננעמען דעם באריכטעטן מיליטערישן אויפבוי אלס א באשטעטיגונג פון אן אטאקע וואס קומט אט אט, ספעציעל נאך די פובליק אפלייקענונג פון סענטקאם. אבער מיט נתניהו וואס לייגט דרוק אויף וואשינגטאן איבער איראן, טראמפ וואס ריקט זיך אפ פון דיפלאמאטישע געשפרעכן, און די אמעריקאנער כוחות וואס האלטן אן זייער אנוועזנהייט אינעם ראיאן, בלייבט די מעגליכקייט פון פרישע אטאקעס א הויפט זארג פאר מדינת ישראל און אירע אליאירטע אינעם ראיאן.