בס"ד 

שוידערליכע ציפערן: 82% שפרונג אין פיזישע אטאקעס קעגן אידן אין ענגלאנד אין די ערשטע העלפט פון יאר 2026
אנטיסעמיטישע אינצידענטן איבער גאנץ ענגלאנד זענען דראסטיש געשטיגן אין די ערשטע זעקס מאנאטן פונעם יאר 2026, ווען די צאל פון פיזישע אנגריפן קעגן אידן זענען ארויפגעשפרינגען מיט אן אומגלויבליכע 82 פראצענט אין פארגלייך צום זעלבן צייט-אפשניט פאראיאר. אזוי צייגט א פרישער, אויפטרייסלנדער באריכט וואס איז ארויסגעגעבן געווארן דורך די ארטיגע זעקיוריטי ארגאניזאציע ‘CST’

געדאפלטע ראטע פון אינצידענטן
דער רעפארט צייגט אז צווישן יאנואר און יוני זענען פארצייכנט געווארן *1,926 אנטיסעמיטישע אינצידענטן - א 21-פראצענטיגע העכערונג פון די 1,598 פעלער וואס זענען באריכטעט געווארן אין די ערשטע העלפט פון יאר 2025. דאס שטעלט זיך אויף א דורכשניט פון ארום 321 אינצידענטן א חודש, וואס איז כמעט דאפלט פונעם מאנאטליכן ראטע ווי בעפאר די בלוטיגע שמחת תורה אטאקעס אויף ארץ ישראל

דורכאויס די זעקס מאנאטן האט די ארגאניזאציע דאקומענטירט צענדליגע פיזישע אטאקעס, צוזאמען מיט אנדערע האס-פארברעכנס:
59% שפרונג אין אנטיסעמיטיזם געצילט אויף לאקאלע שולעס און מוסדות התורה
31% העכערונג אין אטאקעס אויף שולן און בתי מדרשים

צווישן די ערנסטע אינצידענטן ציילט זיך די ברוטאלע שטעכעריי וואס איז פארגעקומען אויף צוויי חרדי'שע אידן אין די 'גאלדערס גרין' געגנט דעם 29'סטן אפריל, א שוידערליכע אטאקע וואס נאך איר זענען רעקארדירט געווארן פרישע 71 אנטיסעמיטישע פעלער אין לויף פון בלויז דריי טעג
אינטערנאציאנאלע טעראר פארבינדונגען

אין דעם באריכט ווערן אויך ארויסגעברענגט א רייע בייזוויליגע אונטערצינדונגען און אטאקעס קעגן בתי מדרשים און אידישע פארמעגנס אין לאנדאן, אריינגערעכנט דאס פארברענען פון לאקאלע 'הצלה' אמבולאנסן. טייל פון די אטאקעס ווערן דירעקט פארבונדן צו איראן'ס טרויעריג-בארימטע 'רעוואלוציאנערע גווארדיע' (IRGC) און אנדערע ראדיקאלע גרופעס וואס זענען שפעטער געווארן אומלעגאל דורך די בריטישע רעגירונג

די פירערשאפט פון CST גיט איבער אז די אטאקעס האבן זיך נאך מער פארמערט נאכדעם וואס די מלחמה צווישן אמעריקע-מדינת ישראל און איראן האט אויסגעבראכן אנהייב יאר. דער הויפט פונעם ארגאניזאציע, מארק גארדנער, האט אלארמירט אז די אנגריפן שפיגלען אפ א ברייטע נעץ פון סטראשונגען - אנגעהויבן פון איראנער-געשטיצטע טעראר קעמערלעך, ביז איסלאמישע, רעכטע, און לינקע עקסטרעמיסטן
 

די בריטישע מיניסטערשע פאר פאליצייאישע אנגעלעגנהייטן, שרה דזשאונס, האט רעאגירט צו די ציפערן אנרופנדיג זיי "אויפטרייסלנד", און האט איבערגעחזר'ט די פולע איבערגעגעבנקייט פון די רעגירונג צו באשיצן די אידישע קהילה אין לאנדאן און איבערן גאנצן לאנד. זי האט אנגעוויזן אז ענגלאנד האט זיך אונטערגענומען צו אינוועסטירין *250 מיליאן פונט אינעם לויף פון די קומענדיגע דריי יאר, ארויסצוהעלפן פארשטארקן די זיכערהייט ביי אידישע בתי מדרשים, מוסדות און קהילה צענטערן.