פולע באריכט און בילדער: היסטארישע באזוך פון הנגיד ר' יואל לאנדא ביים גערער רבי'ן שליט"א: ווי ער האט איבערגעגבן א מיליאן דאלאר פארן עולם התורה און א סעט 'דברי יואל'.
גאלערי
א אייגענארטיגע באזוך איז פארגעקומען דעם דינסטאג במעון הקודש פון כ"ק אדמו"ר מגור שליט"א אין ירושלים עיה"ק, ווען דער בארימטער פילאנטראפ הנגיד החסיד ר' יואל לאנדא הי"ו, וועלכער איז צוגאסט די טעג אין ארץ ישראל ארויסצוהעלפן אחינו בני ישראל בארה"ק, האט באזוכט בקודש פנימה ביים רבי'ן.
ביי דער געלעגנהייט האט ר' יואל איבערגעגעבן פארן רבי'ן א ספעציעלע מתנה, א רייכע סעט פון די ספרים "דברי יואל" פון הרה"ק מסאטמאר זי"ע.
דורכאויס דעם באזוך האט מען דורכגעשמועסט די אנגייענדע מערכה קעגן די שרעקליכע רדיפת הדת בארץ הקודש, ווען ישיבה בחורים ווערן ליידער ארעסטירט פארן זיך נישט שטעלן צום מיליטער.
ביים באזוך, וואו עס איז אויך געווען אנוועזנד דעם רבינ'ס זון הגה"צ ר' נחמיה אלתר שליט"א, האט הנגיד ר' יואל פארגעשטעלט א פלאן און מייסד געווען א נייע קרן, וואס וועט זיין געווידמעט צו קאארדאנירן די גאנצע מערכה קעגן די שווערע סאנקציעס און ארעסטן אויף בחורים און אינגעלייט. דורכדעם וועלן די בחורים און אינגעלייט באקומען כסדר'דיגע הילף, סיי זיך אפצוהיטן פון סיי וועלכע לעגאלע פראבלעם, און סיי מיטן העלפן אויב עס מאכט זיך ליידער א פראבלעם. ווי אויך וועט מען ארבעטן אויף פארשידענע פראנטן צו קעמפן די שווערע גזירה און טון אלעס מעגליך צו פארזיכערן די עקזיסטענץ פונעם עולם התורה.
צו פינאנצירן דעם נייעם קרן האט הנגיד ר' יואל זיך אונטערגענומען אויסצוגעבן א מיליאן דאללער דערפאר, אינאיינעם מיט זיינע חברים און שותפים לדבר מצוה.
דער גערער רבי שליט"א האט גאר ווארעם געוואונטשן פארן נדיב ר' יואל ער זאל מצליח זיין בכל מעשי ידיו, און די פעולות נשגבות זאלן טאקע עושה רושם זיין לטובה.