דראמאטישע שריט: פענטאגאן ציט ארויס אלע אמעריקאנער באמבאדיר-פליגער פון ענגלאנד צוליב איראנער טעראר סטראשונגען

דער פענטאגאן האט אין א שטילע אבער געאיילטע שריט ארויסגעצויגן יעדע איינציגסטע 'B-1' באמבאדיר-פליגער פונעם 'RAF פערפארד' מיליטערישע באזע אין ענגלאנד. די דראמאטישע ארויסציאונג איז פארגעקומען אין לויף פון איין איינציגן טאג, דעם 4'טן אקטאבער. א ווארטזאגער פארן פענטאגאן האט באשטעטיגט אז אלע פליגערס זענען צוריקגעקערט געווארן צו זייערע היימאט-באזעס אין אמעריקע, נאך וואכן פון שווערע זיכערהייט קאנצערנען.

די פלוצלינגדיגע שריט קומט קוים א וואך נאך אן אינצידענט דעם 27'סטן סעפטעמבער, ווען פארדעכטיגטע אויטאס זענען געזען געווארן נעבן דעם פליפעלד. דאס האט געפירט צו די ארעסט פון פינף מענטשן, און שפעטער איז אויך ארעסטירט געווארן א בירגער מיט א טאפלטע בריטיש-איראנער בירגערשאפט, נאכדעם וואס אינוועסטיגעיטארס האבן אנגעהויבן גראבן טיפער.

דער בריטישער פרעמיער מיניסטער, ענדי בוירנהעם, האט געזאגט אז עס זענען דא שטארקע צייכנס אז איראן שטייט אונטער די סטראשע. אין די זעלבע צייט האבן אמעריקאנער באאמטע אנגעוויזן אויף פרישע שפיאנאזש אינפארמאציע - וואס איז לויט באריכטן איבערגעגעבן געווארן דורך מדינת ישראל - וואס האט געווארנט איבער א מעגליכע אטאקע אויף די באזע.

די פערפארד באזע האט געדינט ווי א גאר וויכטיגע צענטער פאר אמעריקאנער באמבאדיר-פליגער דורכאויס די מלחמה קעגן איראן, וואס האט זיך אנגעהויבן דעם 28'סטן פעברואר. די באזע האט דראסטיש פארמינערט די צייט וואס עס האט גענומען פאר די פליגערס צו פליען און באמבארדירן צילן טיף אין איראנער טעריטאריע.

אין די קלימאקס פון די אפעראציעס זענען געווען סטאנציאנירט דארט ביז צוויי טוץ פליגערס אויף איין מאל, אריינגערעכנט ארום 18 'B-1B' פליגערס און א האלבער טוץ 'B-52' פליגערס. די B-52 פליגערס האבן שוין אבער פארלאזט די באזע עטליכע חדשים צוריק, נאכדעם וואס די שלאכטן האבן זיך אביסל אפגעקילט נאך א פייער-אפשטעל אין אפריל.

טראץ די דראמאטישע אויסזען פון די ארויסציאונג, האבן אמעריקאנער באאמטע קלארגעשטעלט אז די אמעריקאנער מיליטער איז נאך אלץ פולשטענדיג אומשטאנד צו באמבארדירן צילן איבער דער גאנצער וועלט דירעקט פון באזעס אין אמעריקע גופא - א מעגליכקייט וואס איז שוין עטליכע מאל איבערגעוויזן געווארן אין די העכסטע פונקטן פון די קאנפליקט.

דער אמעריקאנער סעקרעטערי אוו סטעיט, מארקא רוביא, האט פרובירט אראפצושפילן סיי וועלכע דירעקטע פארבינדונג צו די איראנער סטראשע, זאגנדיג אז די שריט איז בלויז א טייל פון די נארמאלע רוטינע מיליטערישע טוישונגען. דאס קומט אין די צייט וואס באאמטע זאגן אז די בריטישע באזעס קענען מעגליך זען פרישע אקטיוויטעטן פון אמעריקאנער עירקרעפט קעריער גרופעס ענדע אקטאבער.