"כינוס הרבנים" דורך באַרימטער "מרכז הוראה"
ברענגט צונויף נאָנט צו 200 רבנים ודיינים שליט"א

בראשות מומחה לעיני הוראה ומעמיד תלמידים גאונים לרוב הגאון דומ"ץ ביהמ''ד לב אהרן ב''פ וראש בית הוראה דק"ק דעברעצין
שליט"א – אָנגעפולטער טאָג פאר דיינים שליט"א מיט שיעורים והדרכות במקצועות חמורות בתורה
ניו יאָרק. – דער כח התורה וההוראה ביים יהדות החרדית אין ניו יאָרק איז פאַרלאָפענע וואָך שטאַרק
נתרחב געוואָרן, ביים גרויסן מעמד "כינוס הרבנים" וואָס איז אָפּגעהאַלטן געוואָרן דורך דעם באַרימטן
מפעל "מרכז הוראה" בראשות הגאון הגדול דומ"ץ וראש בית הוראה דק"ק דעברעצין שליט"א, וועלכע
האָט צונויפגעברענגט נאָנט צו צוויי הונדערט רבנים ומורי הוראות שליט"א איבערצוגיין א צאָל וויכטיגע
נושאים בהלכה.
דער מרכז ההוראה איז נתייסד געוואָרן מיט עטליכע יאָר צוריק, דורך הגאון הגדול רבי שאול יחזקאל
שוואַרץ שליט"א דומ"ץ ביהמ"ד לב אהרן דסאַטמאַר-ב"פּ פיליעריגער דומ"ץ ויו"ר בית הוראה דק"ק
דעברעצין וואָס שמו הולך לפניו אַלס א תל תלפיות פאר אידן בכלל און דיינים ומורי הוראות שליט"א
בפרט וועמען דער דיין שליט"א איז מדריך מיט די ריכטיגע דרכי ההוראה והפסק ווי ער האָט דאָס מקבל
געווען בשם זקנו, אבי חותנו הגאון הגדול רבי משה שטערן זצ"ל אבדק"ק דעברעצין בעל שו"ת באר
משה, פון די עמודי ההוראה מיט די ריכטיגע מסורה דור אחר דור.
מיט די צייט איז דער שטוב פונעם דיין שליט"א אויסגעשטיגן דער תל תלפיות פאר פילצאָליגע תלמידי
חכמים מופלגים, יושבי אהלה של תורה, וועלכע ווענדן זיך כסדר צום דיין שליט"א צו הערן פון אים די
דרכי ההוראה והפסק לויט די אָרגינעלע מסורות וואָס דער דיין שליט"א האָט מקבל געווען, ועל פי פקודת
גדולי הרבנים והמורים שליט"א, האָט דער דיין שליט"א מייסד געווען דעם באַרימטן "מרכז הוראה" מיטן
איינעם ציל מדריך צו זיין דיינים מומחים, ביז-איצטיגע און פרישע דיינים שליט"א מיט די דרכי הוראה,
וויאַזוי אָנצוקוקן און צוצוגיין צו יעדע שאלה מיטן גאַנצן קלאָרקייט.
במשך השנים איז פון דעם מרכז הוראה שוין אויסגעשטיגן א מספר פון אַריבער "דריי הונדערט" דיינים
מומחים שליט"א וואָס זענען עומדים לשרת בקודש ביי רוב רובם פון די קהלות קדושות בישראל אין ניו
יאָרק, ניו דזשורזי און אויף אַנדערע מקומות אין אַמעריקע און אין אויסלאַנד, וועלכע זענען אַלע געוואָרן
באַגלייט מיט די קלאָרע דרכי ההוראה וואָס מ'האָט מקבל געווען פונעם חשוב'ן דיין שליט"א.
אַצינד האָט דער מרכז הוראה פאַררופן דעם גרויסן "כינוס הרבנים" צו וועלכן עס זענען זיך צונויפגעקומען
אין קאָמפּלעקס פון "ארמון פּלאַזאַ" א גרויסער צאָל פון די דיינים מומחים תלמידים מובהקים פונעם דיין
שליט"א פון די פריערדיגע יאָרן, וועלכע האָבן פאַרברענגט דעם גאַנצן טאָג מיט די שיעורים במקצועות
חמורות וואָס זענען אויסגעשמועסט געוואָרן במשכ'ן טאָג.
דער טאָג האָט זיך אָנגעהויבן מיט א לענגערן שיעור פונעם דיין הגאון רבי שאול יחזקאל שליט"א,
וועלכער האָט ברייט אויסגעשמועסט דעם נושא פון "חולה ביום הכיפּורים". שפּעטער האָט מען געהערט
דעם אויפטריט פונעם באַקאַנטן רופא מומחה דאָקטאָר טשאדנאוו, א חשוב'ער איד וועלכער איז וועלט
באַרימט מיט זיין מומחיות אַרויסצוהעלפן פּאָרפעלקער וואָס זענען מצפים לישועת ה' כהרף עין,
נאָכגעפאָלגט מים וויכטיגן אויפטריט פון דעם באַרימטן עסקן בצרכי רפואה הר"ר הערש אלימלך
פעפערקארן שליט"א מראשי מוסד בוני עולם אין מאָנטרעאַל.
נאָך אן הפסקה איז אָפּגעהאַלטן געוואָרן דער מעמד ההכתרה, ווען דער דיין רבי שאול יחזקאל שליט"א
האָט מכתיר געווען מיטן נזר ההוראה א קבוצה חשובה פון צוואָנציג פרישע מורי הוראות שליט"א, און
מ'האָט דערנאָך ממשיך געווען מיט די ריי שיעורים, פון וואָס דער הויכפּונקט איז געווען דער לענגערער
שיעור פון הגאון רבי חיים אהרן אונגאַר שליט"א דומ"ץ ביהמ"ד לב אהרן דסאַטמאַר-וויליאַמסבורג, פון די
גרעסטע דיינים ביים היימישן ציבור.
נאָך קרוב צו צוועלף שטונדן וואָס די דיינים מומחים שליט"א זענען געווען פאַרזאַמעלט תחת קורת גג
אחד, האָבן די דיינים שליט"א זיך אומגעקערט אַהיים, מלאים וגדושים מיט וויכטיגע ידיעות פון וואָס אלפי
ישראל וועלן בעזהשי"ת נהנה זיין בקרב הימים, ביים אָנפרעגן און מקבל זיין תשובות אויף אַלע שאלות
און נושאים אויף וואָס מען פרעגט כסדר אן ביי די דיינים מומחים שליט"א.
לדין ולהורות דבר ה'