דראמאטישע ווידעא: ריזיגע קרוז שיף קראכט אריין אין א קאנטעינער שיף אין דייטשלאנד

עס האט געזאלט זיין דער אנהייב פון א רואיגע 20-טאגיגע וואקאציע קיין קענערי איילענדס, אבער אנשטאט דעם האט עס זיך געענדיגט מיט א שרעקעדיגע עקסידענט נאך ביים דאק.

דעם 25'סטן אקטאבער אין די אוונט שטונדן, האט די "מיין שיף 3" קרוז שיף פון די TUI קאמפאני זיך צוזאמגעשטויסן מיט א ריזיגע MSC קאנטעינער שיף מיטן נאמען "וויקטארין", בעת זי האט פארלאזט דעם פארט אין ברעמערהאווען, דייטשלאנד. דער אינצידענט האט פאסירט אינמיטן שווערע וועטער אומשטענדן, מיט שטארקע ווינטן און ווילדע כוואליעס. א ווידעא וואס איז געכאפט געווארן דורך פאסאזשירן צייגט ווי די שלעפ-שיפלעך (טאגבאוטס) פלאגן זיך אין די שווערע וואסערן בשעת די צוויי ריזיגע שיפן קראכן זיך צוזאם.

דער קראך האט איבערגעלאזט א ריזיגע לאך פון ארום 33 פיס (10 מעטער) אין די זייט פון די קאנטעינער שיף, העכער די וואסער פלאך, אבער ברוך השם קיין וואסער איז נישט אריינגערונען. די קרוז שיף איז אויך נישט ארויס אומגעשעדיגט; עטליכע רעטונגס-שיפלעך (לייפבאוטס) און זייערע הענגערס זענען צובראכן געווארן, און שטיקער זענען געפלויגן איבעראל.

טראץ די גרויסע פאניק און דראמא, זענען אלע 2,428 פאסאזשירן און 922 מאנשאפט מיטגלידער ארויס אומגעשעדיגט און קיין שום פארוואונדעטע זענען נישט באריכטעט געווארן.

נאכן עקסידענט האט די קרוז שיף זיך געמוזט צוריקקערן צום דאק אפצושאצן די שאדנס, און די געפלאנטע רייזע איז געווארן גענצליך געקענסלט.

דערווייל גייט אן אן אויספארשונג איבער די פונקטליכע אורזאך פונעם צוזאמשטויס, אבער איין פרט בלייבט נאך אומקלאר: די ארטיגע פאליציי זאגט אז סך הכל זענען דריי שיפן געווען פארמישט אינעם עקסידענט, בעת די TUI קאמפאני באשטעטיגט אז בלויז איין קאנטעינער שיף איז געווען אינוואלווד.