שוידערליכע אנטיסעמיטישע אטאקע אין בערלין: 60-יעריגער איד ברוטאל צעשלאגן נאכן באשטעטיגן זיין אידישקייט

א 60-יעריגער איד איז שבת אינדערנאכט ברוטאל אטאקירט געווארן אין בערלין, דייטשלאנד, נאכדעם וואס ער האט באשטעטיגט פאר אן אומבאקאנטן פארשוין אז ער איז א איד. די ארטיגע פאליציי פארשט דעם אינצידענט אלס א קלארע אנטיסעמיטישע אטאקע.

די אטאקע איז פארגעקומען ארום 8:00 אזייגער אין אוונט אין די 'שענעבערג' געגנט אין בערלין, בשעת דער איד איז געזעסן אויף א באנק אינאיינעם מיט א באקאנטן. לויט די בערלינער פאליציי, איז אן אומאידענטיפיצירטער מאן צוגעקומען צום איד, אים אנגעטראגן א ביר, און אנגעהויבן א שמועס. אינמיטן דעם שמועס האט דער פרעמדער אים געפרעגט צו ער איז א איד.

תיכף נאכדעם וואס דער איד האט באשטעטיגט זיין רעליגיע, האט דער פארשוין אנגעהויבן ווארפן אנטיסעמיטישע לאזונגען און זיך אנגעהויבן טענה'ן מיט אים. די סיטואציע האט זיך שנעל פארוואנדלט אין א פיזישע אטאקע ווען דער אטאקירער האט געשפריצט ביר אויפן איד און געווארפן א פולע ביר קען אויף אים, וואס האט אים קוים פארפעלט.

דערנאך האט דער פארשוין אים געגעבן א שטארקן זעץ אין פנים, אים אראפגעווארפן אויף דער ערד, און אים ווייטער געשלאגן בעת ער איז געלעגן אויף דער ערד, בעפאר ער איז אנטלאפן פונעם סצענע.

דער איד האט געליטן פון בלויע פלעקן און וואונדן אין פנים אלס רעזולטאט פון די אטאקע. די פאליציי איז תיכף אלארמירט געווארן, און די אויספארשונג איז איבערגעגעבן געווארן פאר די ספעציעלע פאליציי אפטיילונג וואס גיט זיך אפ מיט פאליטיש-מאטיווירטע פארברעכנס, צוליב די קלארע אנטיסעמיטישע מאטיוון.

דער שוידערליכער אינצידענט האט פריש אויפגעוועקט זארגן איבער די זיכערהייט פון אידישע איינוואוינער אין דייטשלאנד, אין ליכט פון די כסדר'דיגע באריכטן איבער אנטיסעמיטישע אטאקעס און ברוטאלע אינצידענטן קעגן אידן איבערן לאנד.