געוועזענער ווייס פרעזידענט מייק פענס רופט פאר פרעזידענט טראמפ צו "ענדיגן די ארבעט" קעגן איראן

דער געוועזענער ווייס פרעזידענט מייק פענס זאגט אז יעצט ווען די מידטוירם וואלן זענען שוין אריבער, דארף פרעזידענט טראמפ זיך דורכרעדן מיט זיינע הויפט מיליטערישע פירער, פרעגן וואס זיי דארפן, און לאזן די אמעריקאנער און מדינת ישראל קרעפטן "ענדיגן די ארבעט" קעגן איראן.

פענס האט געמאכט די קאמענטארן אין אן אינטערוויו מיטן 'וואשינגטאן עקזעמינער', נאכדעם וואס ער רופט שוין פאר דעם שריט פאר עטליכע מאנאטן. די אמעריקאנער-מדינת ישראל מיליטערישע קאמפיין קעגן איראן, באקאנט אלס "אפעראציע עפיק פיורי", האט זיך אנגעהויבן אין פעברואר 2026.

אין די זעלבע צייט האט פענס אפגעווארפן די מיינונג פון דעם יעצטיגן ווייס פרעזידענט דזשעי. די. ווענס, וועלכער האלט אז די איראנער מלחמה האט געקאסט פאר די רעפובליקאנער דעם קאנטראל פונעם קאנגרעס. לויט פענס, זענען די וויילער געווארן פראסטרירט פונעם פאקט אז אמעריקע האט זיך אפגעשטעלט אינמיטן און נישט דערגרייכט אירע צילן. ער האט אויך אוועקגעמאכט אן אמעריקאנער-איראנער פארשטענדעניש אפמאך וואס ווערט פארבינדן מיט ווענס, אנרופנדיג עס אלס א שריט פון אפיזמענט (נאכגעבן).

דער שפאלט צייגט אן אמת'ע חילוקי דעות צווישן די רעפובליקאנער איבער די עפעקטן פון די מלחמה נאך זייערע פארלוסטן אין די מידטוירמס. בשעת ווענס האט אנגעוויזן אויף די מלחמה אלס די הויפט סיבה פארוואס די פארטיי האט פארלוירן - כאטש ער האט אויך אנערקענט די זארג פון וויילער איבער די הויכע לעבנס-קאסטן - האט פרעזידענט טראמפ פארגעשלאגן אז ווענס זאל זיך קאנצענטרירן אויף אנדערע אישוס, און האט קלארגעשטעלט אז אמעריקע ברויך נישט קיין שום דיעל מיט איראן.

פון די אנדערע זייט, האט סעקרעטערי אף סטעיט מארקא רוביא געזאגט דעם 13'טן נאוועמבער אז די עקאנאמישע דרוק האט שוין גענוג אפגעשוואכט איראן, און עס פעלט נישט אויס קיין פרישע מיליטערישע אקציעס יעצט. רוביא האט אויך אנערקענט די עקאנאמישע פיין וואס די מלחמה האט געברענגט פאר אמעריקאנער בירגער, אריינגערעכנט די הויכע גאז פרייזן.

נאכדעם וואס די דעמאקראטן האבן געוואונען סיי דעם קאנגרעס הויז און סיי דעם סענאט, בלייבט יעצט די פראגע צי טראמפ וועט אננעמען פענס'ס עצה צו נוצן מיליטערישע קראפט, אדער וועט ער ווייטער לייגן דרוק אויף איראן דורך עקאנאמישע מיטלען און פארהאנדלונגען.