פראנקרייך – א ווידעא וואס פארשפרייט זיך אויף די סאציאלע מידיא פלאטפארמע 'עקס' צייגט א גרופע דעליווערי ארבעטער אין פראנקרייך פארזאמלט ארום זעקס ביז אכט סמארטפאונס אויף א פובליק פלאץ, וואו זיי נוצן לויט ווי עס קוקט אויס די דעליווערי עפפס און ווארפן אפ אלע ביליגע אָפערס, ווארטנדיג אויף בעסער באצאלטע רופן.

די וואס טיילן דעם ווידעא זאגן אז די טאקטיק צווינגט די 'אובער איטס' (Uber Eats) אלגאריטעם צו העכערן די פרייזן צו 15 יורא אדער מער פאר יעדע דעליווערי. די באהויפטונג איז דערווייל נישט באשטעטיגט געווארן, און עס איז נישט דא קיין אפיציעלע רעאקציע פון 'אובער איטס', קיין זעלבסטשטענדיגע באריכטן וואו אדער ווען די ווידעא איז געכאפט געווארן, און קיין קראנטע באווייזן אז דאס אפווארפן ארדערס אינאיינעם העכערט טאקע די פרייזן.

דאך האט די קליפ ארויסגערופן א שטורעם, וויבאלד די דעליווערי ארבעטער קאמפלעינען שוין לאנג אז די עפפס באשטימען די פרייזן דורך א באהאלטענע אלגאריטעם וואס די ארבעטער קענען נישט זען אדער קאנטראלירן.

די ווידעא קומט אינמיטן א פיל גרעסערע געפעכט איבער ווי אזוי די דעליווערי פלאטפארמעס באגייען זיך מיט זייערע ארבעטער אין פראנקרייך. דעם 22'סטן אפריל 2026, האבן פיר ארגאניזאציעס וואס העלפן די ארבעטער אריינגעגעבן א קרימינאלע קלאגע פאר מענטשליכע שמוגלעריי קעגן 'אובער איטס' און 'דעליווערו' (Deliveroo). זיי ברענגען אן אנקעטע פון ארום 1,000 ארבעטער, וואס צייגט אז 98 פראצענט זענען געבוירן געווארן אין אויסלאנד און בערך 64 פראצענט האבן בכלל נישט קיין לעגאלע דאקומענטן זיך אויפצוהאלטן אין לאנד.

אסאך פון די אומלעגאלע אימיגראנטן דינגען אקאונטס פון אנדערע מענטשן. איין ארבעטער האט דערציילט אז די אקאונט אייגנטומער פארלאנגען ארום 150 יורא א וואך. דערצו האט א 2025 באריכט פון פראנקרייך'ס ארבעטער אטאריטעט געפונען אז די געהאלט פער שעה ביי Deliveroo, Uber Eats און Stuart איז דראסטיש געפאלן צווישן די יארן 2021 און 2024.

'אובער איטס' האט אנגערופן די קלאגע "אומבאגרינדעט", און 'דעליווערו' ווארפט אפ סיי וועלכע פארגלייך צו אויסנוצונג. די גרויסע פראגעס בלייבן יעצט צי דער טריק מיט די טעלעפאנען ארבעט טאקע, צי די קאמפאניס וועלן רעאגירן דערצו, און וואס דאס זאגט איבער ווי ווייט די ארבעטער זענען גרייט צו גיין צוריקצושלאגן פאר א נארמאלע געהאלט.