שטורעם אין מדינת ישראל: בן גביר פאדערט די שב"כ זאל ארעסטירן אראבישע פירער איבער 'גע'גנב'עטע וואלן'

די נאך-וואלן קאמפן אין מדינת ישראל ווערן אלס מער היציג. דער נאציאנאלער זיכערהייט מיניסטער איתמר בן גביר האט ארויסגעשטעלט א דירעקטע ווידעאו פון זיין אפיס, ארומגענומען מיט מדינת ישראל פלאגן, וואו ער פאדערט אז די שב"כ זאל ארעסטירן יעדן וואס איז פארמישט אין וואס ער רופט "גע'גנב'עטע וואלן", אריינגערעכנט די פירער פון די אראבישע פארטייען. אין צוגאב האט ער דערקלערט אז יעדער וואס איז נישט געטריי צו די מדינה דארף מען צונעמען פון אים דאס רעכט צו שטימען.

זיינע שארפע פאדערונגען קומען נאך די אקטאבער 27 וואלן, אין וועלכע די אראבישע פארטייען האבן ארויסגעצויגן שטארקע געווינסן. דאס קומט אין איינקלאנג מיט די באשולדיגונגען פון פרעמיער מיניסטער בנימין נתניהו און זיין פארטיי אז די וואלן זענען געווען פעלערהאפט און פארדארבן, א סקאנדאל וואס זיי האבן א נאמען געגעבן "ראעם-געיט" (Ra'amgate).

די באשולדיגונגען זענען הויפטזעכטליך איבער קויפן שטימען און אויסלענדישע פאנדינג, מיט קאטאר אנגעצייגט אין טייל פון די קלאגעס. דער פארזיצער פון די צענטראלע וואלן קאמיטע, ריכטער נעם סאלבערג, האט געבעטן דעם שב"כ הויפט דוד זיני אויסצופארשן די פארדאכטן פון אויסלענדישע אריינמישונג און צוריקקומען מיט א באריכט ביז א וואך צייט.

באריכטן צייגן אן אז די פאליטישע פירער וואס מאכן די קלאגעס האבן דערווייל נישט פארגעשטעלט קיין שום קלארע באווייזן פארן פובליק. די אראבישע 'ראעם' פארטיי האט געלייקנט סיי וואספארא אומריכטיגע אקטן, אריינגערעכנט איבער דריי מענטשן וואס די פאליציי האט ארעסטירט אום וואלן-טאג אויפן פארדאכט אז זיי האבן געפלאנט צו באצאלן וויילער פאר זייער שטימע.

אראבישע פארטיי פירער און אפאזיציע מיטגלידער האבן פארדאמט דעם קאמפיין אלס ראסיסטיש און א פרואוו צו דעלעגיטימירן די אראבישע בירגער, בשעת בן גביר'ס שטיצער און מיטארבעטער טענה'ן אז די קעיס איז א פראבע פאר די זיכערהייט פון מדינת ישראל.

דערווייל בלייבט די גרויסע פראגע וואס די שב"כ אויספארשונג וועט טרעפן, און ווי אזוי א באגרעניצונג אויף שטים-רעכטן וואלט געקענט ארבעטן למעשה, וויבאלד דערווייל איז נישטא קיין שום באריכט אז אזא געזעץ רוקט זיך פאראויס.