נייע מיליטערישע טעכנאלאגיע: אמעריקאנער פירמע צייגט פרישע סיסטעם צו שיסן 'דראון שווארעמס' דירעקט פון מיליטערישע טראקס

די אמעריקאנער דעפענס 'סטארטאפ' פירמע "AG3 Labs" האט דעמאנסטרירט א נייע מאדעל פון א דראון ארויסשיס-סיסטעם גערופן "RACK" (רעק), וואס איז ספעציעל דיזיינט געווארן צו קענען ארויסשיסן קליינע FPV דראונס דירעקט פון מיליטערישע טראקס און פלאטפארמעס.

די סיסטעם איז געבויט ווי א ספעציעלע קעסטל וואס קען ווערן ארויפגעשטעלט אויף פארשידענע טראקס, אנשטאט צו זיין צוגעבינדן צו איין ספעציפישע קאר. יעדע אזא קעסטל קען האלטן ביז פינף דראונס, אינאיינעם מיט די בעטעריס און אלע נויטיגע הארדווער. די געדאנק דערפון איז זייער פשוט: מען עפנט דעם דעקל, און די דראונס זענען גרייט צו פליען. דאס שפארט איין אסאך צייט אויפן שלאכטפעלד און גיט פאר די סאלדאטן א שנעלע וועג צו ארויסשיסן א 'שווארעם' פון דראונס אן דארפן שלעפן באזונדערע עקוויפמענט.

ביי די פראבעס האט די פירמע געוויזן ווי פלעקסיבל די סיסטעם איז, ווען זיי האבן עס ארויפגעשטעלט אויף צוויי אומבאמאנטע (unmanned) ראבאטישע טראקס. איינס איז געווען די "AZAK S26", א טראק וואס האט אן אינטערעסאנטע דיזיין וואו די מאטאר, בעטעריס און ברעיקס זענען אלע אריינגעבויט אינעווייניג אין די רעדער זעלבסט. די צווייטע איז געווען די "ULTRA" פלאטפארמע וואס איז דעוועלאפט געווארן דורך די פירמע 'אוועלענד עי-איי'. די פראבעס האבן איבערגעצייגט אז די רעק-סיסטעם קען ארבעטן אויף גאר אנדערע סארטן טראקס, וואס דאס גיט פאר די מיליטער אויף דער ערד א זעלבסטשטענדיגע מעגליכקייט צו ארויסשיסן דראונס אן דארפן צוקומען צו עראפלאנען אדער גרויסע באזעס.

די פירמע "AG3 Labs", וואס האט זיך אנגעהויבן אין די מישיגען סטעיט אוניווערסיטעט, בויט אירע פראדוקטן מיטן ציל צו מאכן ביליגע דראונס וואס מען קען נוצן ווי אמוניציע - דאס הייסט, מען שיסט עס און אויב עס ווערט חרוב אין א קאמף איז נישט קיין קאטאסטראפע, מען קען עס גרינג איבערטוישן, אנדערש ווי די טייערע מיליטערישע עקוויפמענט וואס קאסט מיליאנען און מען ציטערט אויף יעדע קריץ. די פירמע מאכט אויך ספעציעלע סאפטווער און נעטווארק סיסטעמען וואס קאנטראלירן די דראונס און מאכן זיי ארבעטן אינאיינעם. די נייע 'רעק' קעסטלעך זענען א טייל פון דעם גרויסן בילד, וואו די דראונס, די טראקס און די קאמפיוטערס רעדן זיך צונויף אויף איין נעטווארק. די פירמע האט שוין באקומען א צען-יאריגע קאנטראקט מיט די אמעריקאנער דעפענס דעפארטמענט, און זייערע סיסטעמען זענען שוין געווארן אויסגעפריווט ביי גרויסע מיליטערישע איבונגען דורך די נעשאנעל גארד.

די נייע קאנצעפט פון ארויסשיסן דראונס דירעקט פון טראקס צייגט אויף א ברייטערע טויש אין די מיליטערישע טעכנאלאגיע וועלט. אנשטאט צו נוצן ראבאטן אויף דער ערד בלויז פאר זיך אליינס, הייבט מען אן צו נוצן די ראבאטישע טראקס אלס א פלאטפארמע צו שיסן דראונס אין די לופטן. אנדערע מיליטערישע קאנטראקטארס ארבעטן אויך אויף ענליכע פראיעקטן אין די לעצטע צייט. צי די נייע 'רעק' סיסטעם וועט אריינגיין אין פולן באנוץ וועט זיך ווענדן ווי גוט עס וועט זיך אויסארבעטן אין קומענדיגע פראבעס אויף אנדערע סארטן טראקס און אין עכטע קאמף-צושטאנדן, אבער דערווייל איז עס א ריזיגע שריט פאראויס פאר די פירמע צו ווייזן וואס זייער טעכנאלאגיע קען אלס באווייזן.