שוידערליכע ווידעא אנטפלעקט: איראנער-געשטיצטע מיליציע פירט דורך וואפן-טרענירונגען אין א נייע מיידל שולע אין איראן

אן ארויסגערונענע ווידעא האט אויפגערודערט די וועלט, וואו מען זעט ווי באוואפנטע מיטגלידער פון די 'פאטעמאיון' מיליציע - וועלכע ווערט געשטיצט דורך די איראנער רעוואלוציאנערע גווארדיע (IRGC) - פירן דורך מיליטערישע וואפן-טרענירונגען אויף די פראנט פון א ניי-געבויטע מיידל שולע אין סאראוואן, א שטאט אין די סיסטאן און באלוטשעסטאן פראווינץ אין איראן.

די בילדער, וואס זענען צום ערשט באריכטעט געווארן דורך די איראנער מענטשנרעכט גרופע 'האלוואש' און דעקנדיג דורך 'איראן אינטערנעשענאל', ווייזן ווי די טעראריסטן פירן דורך קאמפליצירטע מיליטערישע איבונגען, אריינגערעכנט שיסן פאזיציעס און קאארדינירטע באוועגונגען, דירעקט אויפ'ן קעמפוס פון די שולע.

די 'פאטעמאיון' מיליציע באשטייט הויפטזעכטליך פון אפגאניסטאנער שיאיטישע פליטים וואס וואוינען אין איראן. זיי ווערן רעקרוטירט, טרענירט און באוואפנט דורך די קודס קראפטן פון די איראנער גווארדיע, און האבן א לאנגע היסטאריע פון קעמפן אין די סירישע ברודער-קריג אונטער איראנער אנווייזונגען.

די אנטדעקונג קומט אין א צייט וואס מענטשנרעכט אבזערווירער באריכטן איבער א פארברייטערטע אקטיוויטעט פון די מיליציעס אין די סיסטאן און באלוטשעסטאן פראווינץ. די געגנט איז שוין לאנג באקאנט מיט איר עקאנאמישע נאכגעלאזטקייט און אנגעצויגנקייט צווישן די ארטיגע סוני-מאיאריטעט באפעלקערונג און די צענטראלע איראנער רעגירונג.

אין א באזונדערע אנטוויקלונג האבן לאקאלע אויטאריטעטן געמאלדן פלענער פאר א מאסיווע מיליטערישע איבונג אינעם פראווינץ, וואס ערווארטעט אריינצוציען אזויפיל ווי 100,000 אנטיילנעמער פון די אזוי-גערופענע "איראן-מקריב" באטאליאנען, כאטש די באאמטע האבן נישט קלארגעשטעלט פונקטליך וועלכע קרעפטן עס וועלן נעמען אנטייל דערין.

מענטשנרעכט ארגאניזאציעס, אריינגערעכנט 'אמנעסטי אינטערנעשענאל', האבן שוין אין דער פארגאנגענהייט באשולדיגט די 'פאטעמאיון' גרופע אין קריגס-פארברעכנס און ברוטאלע געוואלדטאטן דורכאויס זייערע מיסיעס אין אויסלאנד. דאס אז זיי געפינען זיך איצט און טרענירן זיך אויף איראנער באדן - און נאך דערצו אויף די פראפערטי פון א שולע פאר יונגע מיידלעך - האט אויפגעוועקט פרישע שרעק און זארג אז טעהראן פלאנירט מעגליך צו נוצן דעם זעלבן מאדעל פון פארא-מיליטערישע קאנטראל קעגן אירע אייגענע בירגער אינעם לאנד.