שוידערליכער אינצידענט: 36-יעריגער מאן ארעסטירט נאכן סטראשען אידישע מוטער און קינד אין 'בינגא' אין אינוואוד

א 36-יעריגער מאן פון לאנג איילענד איז ארעסטירט געווארן דורך די פאליציי, נאכדעם וואס ער האט אנגעבליך געסטראשעט א אידישע מאמע און איר 7-יעריגע טאכטער אינעם לאקאלן 'בינגא' סופערמארקעט אין אינוואוד, ניו יארק.

דער שרעקעדיגער אינצידענט האט זיך אפגעשפילט זונטאג אינדערפרי, נאוועמבער 8, ווען די מאמע האט איינגעקויפט אינעם געשעפט אינאיינעם מיט איר קליין קינד. לויט די פאליציי, איז דער פארדעכטיגטער צוגעקומען צו זיי און אנגעהויבן שרייען אנטיסעמיטישע סטראשונגען, אריינגערעכנט די ווערטער אז מען דארף "אומצוברענגען אלע אידן", און האט דערצו געמאכט צייכנס מיט די הענט ווי כאילו ער האלט א רעוואלווער און צילט אויף זיי.

די נאסאו קאונטי פאליציי האט אידענטיפיצירט דעם פארברעכער אלס חאסאני פערגוסאן, וועלכער איז תיקף נאכן קאנפראנטאציע גענומען געווארן אין פאליצייאישן ארעסט.

דער פאל האט אויפגעוועקט גרויס זארג איבער די זיכערהייט פון די אידישע קאמיוניטי אין די 'פייוו טאונס' געגנט, וואו פילע היימישע פאמיליעס קומען כסדר איינקויפן אינעם פאפולערן סופערמארקעט. די אויטאריטעטן באהאנדלען דעם קעיס אלס א קרימינאלע אויספארשונג, און די קלאגעס וועלן ווערן אויסגעקלארט אין געריכט.