אמעריקאנער אמבאסאדאר אין בעלגיע פאדערט שטרענגערע זיכערהייט ביי ארטאדאקסישע שול אין בריסל נאך וואנדאליזם אינצידענט

דער אמעריקאנער אמבאסאדאר אין בעלגיע, ביל ווייט, האט גערופן פאר א פארשטארקטע סעקיוריטי ביי אן ארטאדאקסישע שול אין בריסל, נאכדעם וואס א שטיין איז אריינגעווארפן געווארן דורך איינע פון די פענסטערס פונעם געביידע, וואס האט אויפגעוועקט ערנסטע זארגן איבער די זיכערהייט פון די ארטיגע אידישע קאמיוניטי.

דער אמבאסאדאר האט אפגעשטאט א באזוך אינעם שול, וואס געפינט זיך אינעם אנדערלעכט דיסטריקט אין בריסל, דעם פארגאנגענעם שבת קודש, נאוועמבער 7, אינאיינעם מיטן מדינת ישראל אמבאסאדאר אין בעלגיע, דוד סאראנגא. דער באזוך קומט נאך אן אינצידענט ענדע אקטאבער, ווען א פענסטער פונעם שול איז געשעדיגט געווארן דורך א שטיין.

ווייט האט געזאגט אז ער וועט לייגן דרוק אויף די בעלגישע אויטאריטעטן צו סטאנציאנירן זעלנער אינדרויסן פונעם בנין צוצושטעלן אן עקסטערע שיץ פאר די מתפללים. ער האט אנגעוויזן אז זיין אריינמישונג אינעם פראבלעם איז געקומען אויף די דירעקטע פארלאנג פון פרעזידענט דאנאלד טראמפ.

די שול, וואס געפינט זיך אויף 'רו דע לא קליניק' אין אנדערלעכט, דינט די לאקאלע ארטאדאקסישע אידישע קהילה. דער אינצידענט און די נאכפאלגנדע דיפלאמאטישע אויפמערקזאמקייט האבן פריש ארויפגעברענגט אויפן טיש די סעקיוריטי זארגן ארום אידישע מוסדות און בתי מדרשים אין בעלגיע.

כאטש וואס ווייט האט אראפגעלייגט דעם שאדן אלס א דירעקטע אטאקע געצילט אויפן שול, האבן די בעלגישע אויטאריטעטן דערווייל נאכנישט באשטעטיגט צי דער אינצידענט איז טאקע געווען א צילברעט פון אנטיסעמיטיזם. די אומשטענדן ארום דעם וואנדאליזם ווערן נאך אלס אויסגעפארשט דורך די לאקאלע פאליציי.

דער באזוך פונעם אמבאסאדאר און זיין רוף פאר א פארשטארקטע שוץ איז דאקומענטירט געווארן דורך די בעלגישע נייעס אגענטור BX1, וועלכע האט פארעפנטליכט ווידעא קליפס וואס צייגט ווי ווייט טרעפט זיך מיט מיטגלידער פון די קהילה אינדרויסן פונעם שול.