קאליפארניע: סאן בערנארדינאו קאונטי וועט נוצן פארגעשריטענע 'עי-איי' דראונס צו באקעמפן וויילדפייערס

אין אן אמביציעזן פרואוו אפצושטעלן וואלד פייערן בעפאר זיי האבן א שאנס זיך צו פארשפרייטן, גייט די סאן בערנארדינאו קאונטי אין קאליפארניע אנהייבן נוצן אויטאנאמישע דראון טעכנאלאגיע.

די לאקאלע פייער דעפארטמענט האט אונטערגעשריבן אן אפמאך מיט די טעכנאלאגיע פירמע 'סענעקא' (Seneca) ארויסצושטעלן א פלאטע פון פינף פייער-לעשער דראונס וואס ווערן געטריבן דורך 'עי-איי' (AI), אינאיינעם מיט א מאביל אפעראציע באזע און ספעציעלע סאפטווער.

די ספעציעלע גרופע פון פינף דראונס איז אויסגעשטאט צו קענען אראפווארפן מער ווי 500 גאלאנען פון פייער-לעשער פאום, ווען איין איינציגער טרענירטער פילאט קאנטראלירט אלע דראונס אויפאיינמאל. מיט די הילף פון ארטיפישעל אינטעלידזשענס און אויטאנאמישע נאוויגאציע, זענען די דראונס געצילט אנצוקומען גאר שנעל צו פרישע פייערן, אריינגערעכנט צו ערטער וואס זענען שווער אדער געפארפול פאר די פייערלעשער אנצוקומען צופוס. דער סיסטעם איז אויך אויסגעשטעלט צו קענען ארבעטן ביינאכט, א צייט וואס טראדיציאנאלע פייער-לעשער העליקאפטערס זענען אפטמאל נישט אוועילעבל.

דער פייער טשיף פון סאן בערנארדינאו קאונטי, דען מאנסי, האט אוועקגעשטעלט אן אמביציעזן ציל אפצושטעלן 90 פראצענט פון פייערן בעפאר זיי וואקסן גרעסער ווי 10 סקווער פיס, און מען ערווארט אז די נייע טעכנאלאגיע וועט שטארק ארויסהעלפן צו דערגרייכן דעם ציל.

אויסער דעם וואס עס וועט אטאקירן פרישע פייערן, זענען די דראונס אויך געמאכט צו באשיצן הייזער און געביידעס דורכן אראפווארפן פייער-פארמיידנדע כעמיקאלן ארום סענסיטיווע ערטער, און וועט ארויסהעלפן די פייערלעשער ביים פארלעשן איבערגעבליבענע פלאמען נאכן קאנטראלירן דעם הויפט פייער. די טעכנאלאגיע וועט אויך פארמינערן די סכנה פאר די פייערלעשער, און וועט ערלויבן אז די עקזיסטירנדע מאנשאפטן זאלן זיך קענען קאנצענטרירן אויף אנדערע עמערדזשענסיס.

די קאונטי ערווארט צו אנהייבן טרענירן די פייערלעשער נאך בעפאר די דראונס קומען אן אין די ערשטע און צווייטע קווארטאל פונעם יאר 2027, און דער פלאן איז אז דער סיסטעם זאל שוין זיין אין פולן באנוץ בעפאר די הויפט וויילדפייער סעזאן פון 2027. אויב אלעס גייט ווי געפלאנט, וועט די נייע פלאטע צושטעלן א פרישע שיכט פון שוץ פאר איינע פון אמעריקע'ס גרעסטע און מערסט געאגראפיש-קאמפליצירטע קאונטיס.