ניסים אין סאו פאולא: א מאנארעיל באן קראכט אריין אין א ריזיגן קראן וואס איז ארויפגעפאלן אויף די שינעס

א שרעקליכע סצענע האט זיך אפגעשפילט אין סאו פאולא, בראזיל, דעם 24'סטן אקטאבער 2026, ווען א מאנארעיל באן אויף די 'ליין 15-פראטא' האט אריינגעקראכט אין א ריזיגן קראן וואס איז צוזאמגעפאלן און ארויפגעפאלן דירעקט אויף די הויכע שינעס נעבן די 'סאו לוקאס' סטאנציע.

דער קראך האט שטארק געשעדיגט די פראנט פונעם באן, און א טייל פונעם קראן האט זיך אפגעבראכן און אראפגעפאלן אויף די גאס אונטן. בחסדי השם זענען קיין פאסאזשירן אויפן באן נישט געשעדיגט געווארן, און בלויז דער אפערירער פונעם קראן האט געליטן וואונדן. בילדער פונעם צובראכענעם קראן איבער די שינעס האבן איבערגעלאזט מענטשן אין שאק, טראכטנדיג וויפיל ערגער דאס האט זיך געקענט אויסלאזן חלילה.

צוליב דעם אינצידענט איז די מאנארעיל סערוויס צייטווייליג אפגעשטעלט געווארן צווישן די 'ווילא פרודענטע' און 'סאו לוקאס' סטאנציעס, און פאסאזשירן ווערן אריבערגעפירט מיט באסעס. די באן אפערירער פארשן איצט אויס וואס האט געפירט דערצו אז דער קראן זאל צוזאמפאלן, אבער דערווייל איז נאכנישט ארויסגעגעבן געווארן קיין אפיציעלע אורזאך.

עס איז אינטערעסאנט אנצומערקן אז די ספעציפישע 'ליין 15-פראטא' האט שוין געהאט עטליכע ערנסטע אינצידענטן אין די לעצטע יארן, אריינגערעכנט א פראנטאלע צוזאמענשטויס צווישן צוויי באנען, ווי אויך פעלער וואו שטיקער קאנקריט זענען אראפגעפאלן פון די הויכע בריקן. ביז די אויספארשונג וועט זיך ענדיגן, איז נישט קלאר ווי לאנג די סערוויס וועט בלייבן פארמאכט און וועלכע פרישע זיכערהייט פראגן דאס וועט אויפברענגען פאר די לאקאלע טראנזיט סיסטעם.