מאסיווע אויפרייס און פייער אין די ריזיגע 'קוועיקער אוטס' פאבריק אין אייאווע; קיינע פארוואונדעטע

סידער רעפידס, אייאווע. – א מעכטיגע אויפרייס נאכגעפאלגט מיט א שווערע פייער האט ארומגענומען א טייל פון די באקאנטע 'קוועיקער אוטס' (Quaker Oats) פאבריק אין דאונטאון סידער רעפידס, אייאווע, דעם פארגאנגענעם שבת אקטאבער 24, שיקנדיג שווארצע געדיכטע רויך איבער די גאנצע שטאט.

די פייער דעפארטמענט איז אלארמירט געווארן ארום 4:45 נאכמיטאג. אנקומענדיג אויפן סצענע האבן די פייערלעשער געטראפן א שווערע פייער ביי די אונטערשטע טייל פונעם געביידע, ווייט פונעם לאקאלן 380 הייוועי. ארטיגע איינוואוינער האבן איבערגעגעבן אז זיי האבן געהערט און געפילט דעם אויפרייס נאך בעפאר די שווערע רויך האט אנגעהויבן ארויסקומען.

בחסדי השם איז די גוטע נייעס אז עס זענען נישט באריכטעט געווארן קיין שום פארוואונדעטע אדער טויטפעלער. באאמטע האבן באשטעטיגט אז בערך א שעה נאכן ערשטן עמערדזשענסי רוף האט מען שוין געהאט א קלארע צאל פון אלע ארבייטער און יעדער איז געווען פארזיכערט. די לאקאלע מעיאר האט אנגעוויזן אז די פאבריק איז געווענליך נישט פול מיט ארבייטער אום שבת, וואס זי האט אנגערופן "א גרויסע ברכה".

די פאבריק איז גאר א ריזיגע קאמפלעקס. די קוועיקער פירמע רופט עס די גרעסטע מיל פאבריק אין די וועלט, א ריזיגע שטח פון 45 עיקערס וואס פראצעסירט מער ווי 2 מיליאן פונט אוטס א טאג און גיט ארבעט פאר מער ווי 700 מענטשן.

די פייערלעשער האבן ווייטער געקעמפט מיט די פלאמען אריין אין די אוונט שטונדן. די אורזאך פונעם אויפרייס איז דערווייל אונטער אויספארשונג, און די 'פעפסיקאו' קאמפאני - וועלכע פאַרמאָגט די פאבריק - האט געמאלדן אז זיי וועלן דורכפירן אן אייגענע אויספארשונג צו זען וואס דא האט פאסירט.

באאמטע האבן געזאגט אז דאס פייער האט אויסגעבראכן אין אן אפטיילונג פונעם בנין וואו מען האנדלט מיט די פראדוקטן, אבער האבן נאך נישט ארויסגעגעבן קיין דעטאלן איבער ווי גרויס די שאדן איז און ווי לאנג עס וועט דויערן עס צו פאררעכטן. עס איז אינטערעסאנט צו באמערקן אז די פאבריק האט שוין געהאט א היסטאריע פון פייערן, ווען א מאסיווע אויפרייס אין יאר 1905 האט פארברענט א גרויס טייל פון די ארגינעלע מיל, וואס ברענגט נאר ארויף מער פראגעס איבער וואס עס האט יעצט פאסירט.