סעקרעטערי אוו סטעיט מארקא רוביא: "איין עלעקשאן אין ווענעזועלע איז נישט גענוג, מיר זוכן א סטאבילע און דויערהאפטיגע רעגירונג"

אמעריקאנער סעקרעטערי אוו סטעיט, מארקא רוביא, האט קלארגעשטעלט אז אמעריקע'ס ציל אין ווענעזועלע איז פיל מער ווי בלויז איין עלעקשאן. "וואס מיר ווילן זען איז נישט נאר פרייע און יושר'דיגע וואלן, נאר א דויערהאפטיגע רעפובליק," האט רוביא געזאגט, אונטערשטרייכנדיג אז דעמאקראטיע דארף זיין עפעס וואס האלט זיך אויף א לאנגע טערמין, און נישט בלויז אן איינמאליגע פאסירנונג.

זיינע ווערטער קומען אין די צייט וואס אמעריקאנער באאמטע האבן זיך געטראפן מיט די פירערשאפט פון די אינטערים רעגירונג אין ווענעזועלע. ביי די געשפרעכן האט מען ארומגערעדט איבער איבערבויען די חובות און צוריקשטעלן די רעגירונג אינסטיטוציעס, וואס זענען וויכטיגע פארלאנגען בעפאר מען קען בכלל אפהאלטן געהעריגע וואלן. רוביא האט געווארנט אז עס איז דא אן ערנסטע סכנה אין זיך יאגן צו מאכן וואלן צו פרי. ער האט אנגעוויזן אז אויב מען וועט איבערגעבן די מאכט פאר א נייעם פירער ווען דאס לאנד געפינט זיך אין א טאטאלע עקאנאמישע און סאציאלע קאטאסטראפע, קען דאס לייגן דעם גאנצן דעמאקראטישן פראצעס אין א סכנה פונעם ערשטן טאג.

דער הויפט פונקט פון רוביא'ס מעסעדזש איז געווען אז דער פאליטישער טראנזיציע פראצעס וואס גייט יעצט אן דארף האבן צייט זיך צו אנטוויקלען בעפאר מען גייט צו די שטים בודקעס. ער האט אנגעוויזן אז פירער פון די 2015 'נעשאנאל אסעמבלי' זענען יעצט אין רעגולערע געשפרעכן מיט די אינטערים אויטאריטעטן איבערצובויען די נויטיגע אינסטיטוציעס, כדי די וואלן זאלן טאקע האבן א באדייט.

די סיטואציע איז גאר האקל צוליב די עקאנאמישע צוזאמברוך אינעם לאנד און די פאקט אז אפאזיציע פירער, ווי מאריא קארינא מאטשאדא, געפינען זיך נאך אלץ אין פאליטישע גלות. מאטשאדא ווערט נאך אלץ בלאקירט פון זיך צוריקקערן קיין ווענעזועלע, טראץ די וואקסנדע דרוק צו באשטימען א קלארע דאטום פאר די וואלן.

צום סוף האט רוביא קלארגעמאכט אז דער ציל איז נישט סתם צו קענען זאגן אז מען האט אפגעראכטן וואלן און פערטיג, נאר צו מאכן זיכער אז די נייע רעגירונג וואס וועט ארויסקומען דערפון זאל קענען איבערלעבן און פירן דאס לאנד, אנשטאט צוזאמצופאלן אונטער די שווערע לאסט פון די קריזיס וואס זי גייט ירש'ענען.