בס"ד

מאסקווע — א פרישע כשר'ע קאפע-רעסטאראן האט זיך געעפנט אין די הויפטשטאט מאסקווע, וואס קומט צו ווי נאך א געשמאקע אפציע פאר די ארטיגע אידישע קהילה און פאר די פילע באזוכער וואס זוכן כשר'ע עסן.

דער נייער איינריכטונג, אונטערן נאמען "קאשער סטייל" (Kosher Style), האט געעפנט אירע טויערן דעם פארגאנגענעם מיטוואך, סעפטעמבער 9, אויף די 'נאוואסלאבאדסקאיא' סטריט. דער רעסטאראן שטעלט צו א רייכע און פארשידנארטיגע מעניו וואס נעמט אריין קולינארישע טראדיציעס פון עטלעכע לענדער.

צווישן אנדערן קען מען דארט טרעפן אוזבעקישע פלאוו, בארשט, פארשמאק, חמוס, פעלמעני און נאך פארשידענע מאכלים, וואס גיט פאר די קאסטומערס א ברייטע אויסוואל ארויס פון די געווענליכע טראדיציאנעלע אידישע קאך.

ביי די פייערליכע עפענונג האט זיך אנגעזען די באזוך פונעם הויפט רב פון רוסלאנד, הגאון ר' בערל לאזאר שליט"א, וועלכער איז געקומען אפזיכטן דעם נייעם פלאץ. דער רב האט ארומגעקוקט אין די קאך און אין די עס-זאל, און פונקטליך איבערגעקוקט די מעניו. ביים ענדע פונעם באזוך האט דער רב איבערגעגעבן פאר די אייגנטומער אן אפיציעלע 'תעודת הכשר' וואס באשטעטיגט די כשרות פון אלע מאכלים וואס ווערן דארט סערווירט.

די עפענונג פון דעם נייעם קאפע קומט אלס א צוגאב צו די ברייטע נעץ פון כשר'ע רעסטאראנען און געשעפטן וואס באדינען די וואקסנדע אידישע באפעלקערונג אין מאסקווע. די שטאט פארמאגט שוין היינט צוטאגס א שיינע צאל כשר'ע איינריכטונגען וואס זענען אנגעשלאסן אין די לאקאלע אידישע קהילה צענטערן און געפינען זיך אין פארשידענע געגנטער איבער די שטאט.