מאלדאווע-אוקריינע גרעניץ — טויזנטער אידן וואס זענען אויפן וועג קיין אומאן אויף ראש השנה, האבן זיך אנגעשטויסן אין גאר לאנגע ווארטן-צייטן ביים מאלדאווע-אוקריינע גרעניץ, בעת די לעצטע כוואליע פון מתפללים מאכן זייער וועג אריין קיין אוקריינע בעפאר יו"ט.

ווי מען קען זען אויף בילדער און ווידעאוס פונעם ארט, ציען זיך לאנגע רייעס פון קארס און באסעס וואס זענען אפגעשטעלט אויפן שאסיי. פילע רייזנדע זענען געזען געווארן שטיין אינדרויסן פון די טראנספארט מיטלען, ווארטנדיג מיט אומגעדולד צו קענען אריבערגיין דעם באדער און פארזעצן דעם וועג קיין אומאן.

ווי באקאנט זענען די אוקריינישע לופטן פארמאכט פאר ציווילע פליגערס צוליב די אנגייענדע מלחמה, וואס צווינגט די אלע וואס פארן קיין אומאן צו נעמען פלייטס קיין ארומיגע לענדער און פון דארט פארן ווייטער אריבער די יבשה. מאלדאווע איז פארוואנדלט געווארן אין איינע פון די הויפט טראנזיט רוטס, און עטליכע מאלדאווע-אוקריינע גרעניץ-פונקטן ווערן באנוצט דורך די מאסן אידן וואס מאכן דעם רייזע.

די דרוק אויף די גרעניצן ווערט אלס גרעסער וואס נענטער עס קומט צו ראש השנה. לויט ציפערן וואס זענען ארויסגעגעבן געווארן דורך די 'פאראייניגטע אידישע קאמיוניטי פון אוקריינע', זענען שוין מער ווי 16,000 אידן אנגעקומען קיין אומאן ביז סעפטעמבער 9, און פרישע גרופעס קומען כסדר אן אן אפהאלט.

די היי-יאריגע קאלענדאר מאכט די פארהאלטונגען ביים באדער פיל מער קריטיש, וויבאלד ראש השנה געפאלט פרייטאג צונאכטס. דאס לאזט איבער די רייזנדע וואס זענען נאך אויפן וועג מיט א גאר שמאלע צייט-אפשניט אנצוקומען קיין אומאן בעפארן זמן כניסת החג.