בס"ד

שווערע שאדנס נאך וואס א פייער האט פארניכטעט א גרויסן טייל פון א חב"ד צענטער אין צפת מוצאי יום כיפור

צפת. - א שווערע פייער וואס האט אויסגעבראכן מוצאי יום כיפור האט איבערגעלאזט גרויסע שאדנס אין א לאקאלע צענטער אין צפת, וואס דינט אלס די היים פאר די 'קעמפ גן ישראל' דעי-קעמפ און אנדערע יאר-ארום פראגראמען פאר לאקאלע קינדער און יוגנטליכע וואס נויטיגן זיך אין הילף.

לויט ווי די פירער פון די ארגאניזאציע געבן איבער, איז בערך א דריטל פונעם קעמפוס אינגאנצן פארניכטעט געווארן אין די פלאמען, בשעת אנדערע טיילן פונעם בנין האבן געליטן שווערע שאדנס פון דעם שווארצן רויך און גיפטיגע גאזן. צווישן די חרוב'ע פארמעגנס ציילן זיך די אפיסעס, קאמפיוטערס, טירן, די עלעקטרישע סיסטעם און אנדערע וויכטיגע אינפראסטרוקטור.

דער צענטער באדינט מער ווי 100 קינדער דורכאויס דעם יאר, צושטעלנדיג קלאסן, אקטיוויטעטן און פארשידענע פראגראמען פאר קינדער פון אלע קרייזן אין צפת. די פראגראמען ווערן אנגעפירט דורך הרב שמאי גוזלן, וועלכער האט געגרינדעט דעם לאקאלן 'גן ישראל' דעי-קעמפ אין די צייטן פון די קאוויד-19 מגיפה, נאכדעם וואס ער האט געזען ווי קינדער אין די קאמיוניטי זענען געבליבן אן זייערע געווענליכע מוסדות, קעמפס און שטיצע סיסטעמען.

די עסקנים האבן אנגעוויזן אויף א וואונדערליכע ערשיינונג, ווען עטליכע הייליגע חפצים זענען איבערגעבליבן גאנץ טראץ די שווערע פלאמען וואס האבן אלעס ארום פארברענט. צווישן אנדערע זענען געראטעוועט געווארן ספרי תניא און מזוזות, ווי אויך א בילד פונעם ליובאוויטשער רבי'ן זצ"ל, א בילד פונעם בית המקדש, און דער פאן פון קעמפ גן ישראל, וואס זענען געבליבן אומבאשעדיגט.

די ארגאניזאציע האט שוין אנגעהויבן מיט פיבערהאפטיגע פלענער און באמיאונגען איבערצובויען דעם חרוב'ן צענטער און צוריקשטעלן די וויכטיגע פראגראמען פאר די לאקאלע קינדער און יוגנטליכע ווי אמשנעלסטן.