פערוואמייסק, אוקראינע — די ארטיגע אידישע קהילה אין פערוואמייסק, אין די מיקאלייעוו ראיאן אין אוקראינע, האט די וואך געפראוועט א גאר היסטארישע מאמענט מיט די חנוכת הבית פון א פראכטפולע נייע מקוה טהרה, די ערשטע מקוה וואס ווערט געעפנט אין די שטאט זינט דעם ביטערן חורבן אייראפע.

טראץ א לייכטע רעגן וואס איז געפאלן, האבן זיך פילע קהילה מיטגלידער פארזאמלט צום לאנג-ערווארטעטן מעמד. די עפענונג פונעם מקוה צייכנט אפ א מעכטיגע שריט פאראויס אין די אויפלעבונג פון אידישקייט אין די שטאט, וואו די ארגאניזירטע אידישע קהילה איז שוין אקטיוו פאר ארום 28 יאר.

דער גאנצער פראדזשעקט איז אנגעפירט געווארן דורך די לאקאלע חב"ד שלוחים, הרב לוי יצחק פערלשטיין און זיין פרוי חנה. די בוי-ארבעט האט זיך נאך אנגעהויבן בעפאר די קאוויד פאנדעמיע, און איז אנגעגאנגען מיט מסירת נפש דורכאויס די לעצטע פאר שווערע יארן, אריינגערעכנט די יעצטיגע אנגייענדע מלחמה אין אוקראינע וואס האט געברענגט גרויסע שוועריגקייטן.

ביים געהויבענעם מעמד החנוכת הבית האבן זיך אנגעזען עטליכע חשוב'ע געסט, דערונטער הרב שלום גאטליב, דער הויפט רב פון מיקאלייעוו און דעם גאנצן ראיאן, ווי אויך הרב דניאל לאנאו, א מומחה אין הלכות מקואות און א חב"ד שליח אין קיעוו. צוזאמען מיט זיי האבן זיך באטייליגט קהילה פירער, נדבנים, און פארשטייער פון פארשידענע אידישע ארגאניזאציעס.

דורכאויס די צערעמאניע זענען קובע געווען מזוזות ביים נייעם בנין, און דערנאך איז פארגעקומען די אפיציעלע 'ריבאן קאטינג' (שניידן דעם בענדל). די באטייליגטע האבן דערנאך באקוקט די נייע מקוה און זיך געזעצט צו א שיינע סעודת מצוה און מסיבת לחיים.

די לאקאציע פונעם נייעם בנין טראגט מיט זיך א באזונדערע היסטארישע חשיבות. די מקוה איז געבויט געווארן אויפ'ן פונקטליכן ארט וואו עס איז אמאליגע יארן געשטאנען די שטוב פון די באקאנטע משפחת היילפרין, וועמענס קינדער און אייניקלעך האבן געדינט אלס רבנים און דיינים אין די שטאט — וואס איז היסטאריש באקאנט געווען אלס 'באגאפאל' — פאר עטליכע דורות.

די חנוכת הבית איז א טייל פון א ברייטערע קאמפיין צו פארשטארקן די אידישע אינפראסטרוקטור אין פערוואמייסק. די קהילה רוקט זיך יעצט פאראויס מיט פרישע פלענער צו בויען א צענטראלע שול וואס וועט דינען די לאקאלע אידישע איינוואוינער.

נאך מער ווי אכציג יאר אן א מקוה טהרה אין שטאט, האבן די קהילה פירער אויסגעדרוקט האפענונג אז דער נייער בנין וועט דינען אלס אן אנהייב פון א פרישע תקופה פון וואוקס און בליה פאר אידישקייט אין פערוואמייסק.