ירושלימ'ער פאליציי קערט צוריק אן אור-אלטע ספר תורה קעסטל פאר א פאמיליע, איבער 20 יאר נאך די גניבה
גאלערי
ירושלים: פאליציי קערט אום אן אנטיקע 'ספר תורה קעסטל' צו די משפחה, 20 יאר נאכ'ן ווערן געגנבעט פון שול
ירושלים - די ארטיגע פאליציי האט צוריקגעקערט אן אנטיקע און גאר טייערע ספר תורה קעסטל צו די משפחה פונעם ארגינעלן נדבן, מער ווי צוואנציג יאר נאכדעם וואס עס איז געגנבעט געווארן פון א לאקאלע שול.
די טייערע היסטארישע חפץ איז אפגעפונען געווארן אינגאנצן אומגעראכטן דורכאויס א פאליצייאישע אבלאווע. די פאליציי האט דורכגעפירט אן אפעראציע געצילט קעגן פארדעכטיגטע אומלעגאלע וואפן האנדלער, און ביי א זוך אקציע אין די היים פון איינע פון די פארדעכטיגטע האבן זיי זיך אנגעשטויסן אין דעם אנטיקן קעסטל.
נאכ'ן טרעפן דעם חפץ, האבן די אויספארשער אנגעהויבן נאכצוגיין די שפירן צו אידענטיפיצירן דעם היסטארישן ארטיקל. עס האט נישט געדויערט לאנג און זיי האבן באוויזן צו דערגיין די מקור דערפון און עס צוריקפירן צו די משפחה וואס איז פארבונדן מיט די ארגינעלע נדבה פאר די שול.
דאס קעסטל איז צוריקגעגעבן געווארן פאר די פאמיליע אין א ספעציעלע איבערגאבע צערעמאניע, וואס האט געברענגט אן עמאציאנעלע ענדע צו א מיסטעריע וואס האט זיך געצויגן פאר מער ווי צוויי יארצענדלינגען.