קאמאנדיר פונעם 90'טן פריסינקט שטאט אפ א באזוך אין די נייע הויפטקווארטירן פון 'חברים ד'וויליאמסבורג'

קעפטעין ווינצענט סעמינעריא, דער קאמאנדיר פונעם ארטיגן 90'טן פריסינקט, האט די וואך אפגעשטאט א באזוך אין די נייע הויפטקווארטירן פון 'חברים ד'וויליאמסבורג' אויף 98 לארימער סטריט. ער איז באגלייט געווארן דורך דעם פאליציי קלערדזשי ליעזאן רעווערענד מאנועל ווייסער, קאמיוניטי אפעירס אפיציר קעני דובויס, און עטליכע פון זיינע הויפט אפיצירן.

די וויליאמסבורגער חברים ארגאניזאציע, וואס איז געגרינדעט געווארן אין יאר 2001, איז אין די לעצטע יארן געוואקסן אין א ריזיגן פארנעם. בלויז פאראיאר האבן די וואלאנטירן געענטפערט צו קרוב צו 16,000 רופן אין וויליאמסבורג אליין. די גרופע איז א טייל פון די גרעסערע 'חברים ד'ברוקלין' נעצווערק, וואס האט באהאנדלט מער ווי 77,000 רופן אין איין יאר.

דעם פארגאנגענעם חודש אוגוסט האט חברים געעפנט אירע נייע הערליכע הויפטקווארטירן אויף לארימער סטריט, וואס פארמאגט א מאדערנע קאל-סענטער, א ספעציעלע פלאץ צו האלטן און פאררעכטן די עקוויפמענט, א קאנפערענץ צימער, און צימערן פאר טרענירונגען.

דורכאויס דעם באזוך האבן די חברים וואלאנטירן ארומגעוויזן פאר קעפטעין סעמינעריא און זיין שטאב דעם קאל-סענטער. די אפיצירן האבן מיטגעהאלטן לעבעדיג ווי די דעספעטשערס נעמען אויף רופן און האבן באטראכט ווי די קאמפיוטער טרעקינג און ראדיא סיסטעמען ארבעטן בשעת געהעריגע רופן זענען אריינגעקומען. דער קעפטעין און זיינע אפיצירן האבן אויך באטראכט די ספעציעלע עקוויפמענט און געצייג וואס די חברים וואלאנטירן נוצן ארויסצוהעלפן דעם ציבור.

צום שלוס האבן קעפטעין סעמינעריא און די פירער פון חברים ארומגערעדט איבער פארשידענע וועגן וויאזוי צו פארשטארקן די קאאפעראציע צווישן די פאליציי דעפארטמענט און חברים, כדי צו קענען אינאיינעם בעסער סערווירן די וויליאמסבורגער קאמיוניטי.