המוני אידן זאגן סליחות ביים כותל המערבי אין די לעצטע טעג פון חודש אלול

מאנטאג אינדערפרי, כ"ה אלול, האבן זיך פארזאמלט א גרויסע צאל מתפללים ביים כותל המערבי אין ירושלים אפצורעכטן סליחות, בעת כלל ישראל גייט אריין אין די לעצטע טעג פון הכנה צום גרויסן יום הדין ראש השנה.

אין די בילדער און ווידעאוס וואס זענען פארעפנטליכט געווארן פונעם רחבת הכותל, זעט מען די פילע מתפללים איינגעהילט אין די טליתים, זאגנדיג די סליחות מיט גרויס התעוררות אין די פריע פארטאגס שטונדן.

דורכאויס דעם גאנצן חודש אלול קומען פאר גרויסע סליחות פארזאמלונגען ביים שריד בית מקדשנו. די 'קרן למורשת הכותל' ארגאניזירט יעדן נאכט א צענטראלן מנין, באגלייט מיט א חזן און הויכהילכערס אז דער גרויסער ציבור זאל קענען געהעריג מיטהאלטן די תפילות. דער מאנטאג'דיגער מעמד, כ"ה אלול, איז געווען א טייל פון די אפיציעל-געפלאנטע סליחות פארזאמלונגען.

די מעמדי הסליחות וועלן ווייטער אנגיין אין די געציילטע טעג וואס זענען פארבליבן ביז ראש השנה, אריינגערעכנט א מאסיווע צענטראלע סליחות פארזאמלונג וואס איז געפלאנט אויף ערב ראש השנה, וואו עס ווערט ערווארטעט א ריזיגע באטייליגונג פון טויזנטער אידן.