המוני עם ביי "ערשטע סליחות" מיט'ן באקאנטן זינגער פיני איינהארן אין ירושלים

א גרויסער ציבור מתפללים האט זיך מוצאי שבת קודש מיטגעטיילט ביי א ספעציעלע "ערשטע סליחות" מעמד אין ירושלים, אנגעפירט דורכ'ן באקאנטן זינגער פיני איינהארן, אין די צייט וואס כלל ישראל טרעט אריין אין די לעצטע געהויבענע טעג בעפאר דעם יום הדין ראש השנה.

דער גרויסארטיגער מעמד איז פארגעקומען אינעם 'ראמאדא' האטעל אין ירושלים, וואו איינהארן האט געדאוונט פאר'ן עמוד און אנגעפירט א לענגערע מוזיקאלישע סליחות פראגראם באגלייט מיט כלי זמר. די סליחות האט זיך אנגעהויבן שפעט מוצאי שבת און האט זיך פארצויגן ביז אין די פריע זונטאג פארטאגס שעה'ן.

אין די ווידעאו קליפס פונעם מעמד קען מען זען ווי דער זינגער, איינגעהילט אין א טלית, פירט אן די סליחות מיט גרויס התעוררות, בשעת דער גרויסער ציבור זינגט מיט מיט די תפילות און ווארעמע ניגונים.

די ספעציעלע סליחות איז צוגעשטעלט געווארן מיט די אנטיילנעמונג פון די אפטיילונג פאר חרדי'שע קולטור אין די ירושלים'ער עיריה, און איז א פארזעצונג פון א סעריע פון "ערשטע סליחות" מעמדים וואס ווערן אנגעפירט דורך איינהארן אין די לעצטערע יארן.