אוקראינע: טראץ די שווערע מלחמה צושטאנדן גרייטן זיך צענדליגער טויזנטער אידן צום נייעם יאר תשפ"ז מיט א ריזיגע חלוקה אפעראציע

אוקראינע. — טראץ די אומאויפהערליכע רוסישע אטאקעס און די ברייטע חורבנות צו די אינפראסטרוקטור, איז א ריזיגע ראש השנה חלוקה אפעראציע אין פולן שוואונג, צו פארזיכערן אז צענדליגער טויזנטער אידן איבער גאנץ אוקראינע זאלן קענען פראווען דעם יו"ט מיט א שפע פון עסן און אלע טראדיציאנאלע יו"ט געברויכן.

די ארגאניזאציע 'JRNU' (דזשואיש רעליף נעטווארק אוקראינע) טיילט אויס עסן פעקלעך איבערן גאנצן לאנד אין בעפארגרייטונג צו ראש השנה, בעת די אידישע קהילות אין אוקראינע גרייטן זיך אפצוצייכענען זייער פינפטע ראש השנה זינט דעם אויסברוך פון די פולשטענדיגע מלחמה.

די אפעראציע קומט נאך פרישע רוסישע אטאקעס אויף קיעוו און אנדערע ראיאנען, וואס האבן געברענגט שווערע שאדנס פאר עסן-פראדוקציע פאבריקן, אינדוסטריעלע צענטערן און לאגיסטישע אינפראסטרוקטור. לויט די JRNU פירערשאפט, האט דער מאנגל אין סופערמארקעטס איבערגעלאזט די פאליצעס כמעט ליידיג אין געוויסע געגנטער, וואס מאכט די היי-יעריגע חלוקה פיל מער וויכטיג און קריטיש ווי קיינמאל בעפאר.

אינעם צענטער פון די אפעראציע שטייט א כשר'ע האניג פאבריק אינעם קיעווער ראיאן. טראץ וואס די ארומיגע לאגיסטיק צענטערן און ווערהאוזעס האבן געליטן שווערע חורבנות ביי די לעצטיגע אטאקעס, איז די פאבריק אליינס געבליבן שטיין און גייט ווייטער אן מיט די פראדוקציע אפילו אינמיטן די פייפערייען פון די סירענעס.

די ארגאניזאציע האט אין די לעצטע צייט אריבערגעפירט א גרויס טייל פון די פראדוקציע פון וויכטיגע כשר'ע מאכלים קיין אוקראינע זעלבסט, כדי צו פארמינערן די אפהענגיקייט פון קאמפליצירטע אימפארטן אין צייט פון מלחמה. אויסער דעם לאקאל-פראדוצירטן האניג, ווערט אויך פלייש און עופות פראדוצירט אינעם לאנד ספעציעל פאר די גרויסע חלוקה.

די ראש השנה פעקלעך אנטהאלטן עופות, פרישע פלייש, מילכיגע פראדוקטן, קענס, און דעם לאקאלן האניג. ספעציעלע יו"ט באקסעס אנטהאלטן אויך האניג לעקאך וואס איז געברענגט געווארן פון ארץ ישראל, האניג קוקיס פון מזרח אוקראינע, אידישע לוח'ס, און קונטרסים וואס זענען מסביר די הלכות און מנהגים פונעם הייליגן יו"ט.

די סופלייס ווערן טראנספארטירט צו די אידישע קהילה צענטערן איבער גאנץ אוקראינע, פון וואו עס ווערט צעטיילט לאקאל פאר די משפחות. די ארגאניזירער זאגן אז זיי גרייטן זיך אויפצונעמען טויזנטער משפחות וואס וועלן זיך באטייליגן ביי די תפילות ראש השנה און יום כיפור, טראץ די אנגייענדע מלחמה און די טעגליכע זיכערהייט פראבלעמען.

די מאסיווע אונטערנעמונג גיט א קלארן בליק וויאזוי דאס אידישע לעבן גייט אן ווייטער איבער אוקראינע, בעת די קהילות גרייטן זיך אריינצוטרעטן אינעם נייעם יאר שנת תשפ"ז אונטער גאר שווערע און אומגעווענליכע אומשטענדן.