לאנדאן: אידישע קהילה פירער פאדערן פארשטארקטע פאליצייאישע וואך ארום מוסדות און בתי מדרשים בעפאר גרויסע פראטעסט

אידישע קהילה פירער אין ענגלאנד רופן פאר א פארשטארקטע פאליצייאישע אנוועזנהייט און שוץ ארום אידישע מוסדות און קהילה צענטערן, אין ליכט פון א מאסיווע פראטעסט וואס איז געפלאנט פארצוקומען אין צענטראל לאנדאן דעם קומענדיגן נאוועמבער 20.

די 'באורד אף דעפיוטיס' פון די בריטישע אידנטום האט זיך געוואנדן צו די לאקאלע פאליציי און אנדערע אינסטאנצן מיט א פאדערונג צו צושטעלן עקסטערע זיכערהייט מיטלען. דאס קומט צוליב ערנסטע זארגן אז די געפלאנטע פרא-פאלעסטינער דעמאנסטראציע קען פירן צו כאאס און שטעלן אין געפאר די זיכערהייט פון די ארטיגע אידישע איינוואוינער.

די פאדערונג שפיגלט אפ די וואקסנדע אנגסט צווישן די אידישע קהילות, ספעציעל נאך די לעצטיגע באריכטן פון געוואלדטאטן און ראיאטן וואס האבן אויסגעבראכן ביי ענליכע פראטעסטן אין פראנקרייך.

די פראטעסט ווערט ארגאניזירט און פראמאטעט דורך יוגנטליכע און סטודענטן אקטיוויסטן גרופעס, וועלכע רופן דעם ציבור זיך צו באטייליגן אין גרויסע מאסן. אידישע פארשטייער האבן געבעטן די אויטאריטעטן צו נעמען די נויטיגע שריט צו באשיצן סענסיטיווע לאקאציעס איבער די קהילה.

די 'מעטראפאליטאן פאליציי' האט רעאגירט אז זיי זענען אינפארמירט איבער די געפלאנטע דעמאנסטראציע און אז אפיצירן גרייטן זיך אהערצושטעלן א פאסיגע פאליצייאישע רעספאנס, כאטש עס איז דערווייל נישט דא קיין באשטעטיגונג אז עס וועט טאקע קומען צו געוואלדטאטן ביים לאנדאנער ראלי.

פאר אידישע פאמיליעס און מוסדות איבער די הויפטשטאט איז די הויפט זארג צו פארזיכערן אז דאס טעגליכע אידישע לעבן, בתי מדרשים און מוסדות זאלן קענען אנגיין רואיג און זיכער, אן קיין שום פראוואקאציעס אדער שטערונגען. די רוף פון די קהילה פירער אונטערשטרייכט די וויכטיגקייט פון נעמען פאראויסדיגע זיכערהייט שריט און אנהאלטן א נאנטע קאארדינאציע צווישן די אידישע פארשטייער און די געזעץ ענפארסמענט אגענטורן.