בס"ד

שוידערליכע אכזריות: דריי קינדערגארטן ארבעטערינס אין רעננה ארעסטירט פארן פייניגן קליינע קינדער

די פאליציי אין ארץ ישראל האט ארעסטירט דריי פרויען וועלכע ארבעטן אלס געהילפן אין א לאקאלע 'דעיקעיר' אין די שטאט רעננה, נאכדעם וואס זיי זענען אונטער א שווערע פארדאכט פון פייניגן און זיך באגיין מיט אכזריות צו קליינע קינדער. די אויספארשונג האט זיך אנגעהויבן נאכדעם וואס אן 11-חודש'יג קינד איז אריינגעברענגט געווארן אין די 'מאיר' שפיטאל מיט א וואונד ביי זיין אויער.

דער אינצידענט האט געפירט דערצו אז אינוועסטיגעיטארס פון די כפר סבא פאליציי סטאנציע זאלן עפענען א געהיימע אויספארשונג אויף די דעיקעיר.

ווי נאר די פאליציי האט אנגעהויבן איבערצוקוקן די באווייזן און ווידעא קאמערעס פונעם פלאץ, זענען ארויפגעשווימען שווערע פארדאכטן אז דאס קינד'ס וואונד איז ווייט פון אן איינמאליגע פאסירונג. די אויספארשער זאגן אז זיי האבן אנטדעקט שוידערליכע אקטן פון געוואלדטאטן קעגן עטליכע קליינע טאדלערס אינעם פלאץ.

לויט ווי די פאליציי גיט איבער, זענען די ארבעטערינס פארדעכטיגט אין אויפהייבן די קליינע קינדער מיט קראפט און זיי אראפווארפן אויפ'ן פלאר, שלעפן די קינדער ביי די אויערן, און ווארפן אויף זיי פארשידענע חפצים.

נאכדעם וואס די אינוועסטיגעיטארס האבן גענוצט טעכנאלאגישע מיטלען און דאקומענטאציע פון אינעווייניג אינעם דעיקעיר, און עס איז צוזאמגעשטעלט געווארן א קלארע באווייז-באזע, איז די אויספארשונג פארוואנדלט געווארן אין אן אפענע, און די דריי פרויען זענען ארעסטירט געווארן. די סוספעקטס זענען איינוואוינער פון רעננה אין די 30'ער און 50'ער יארן.

א קאורט האט שפעטער פארלענגערט זייער ארעסט בעת די אויספארשונג גייט אן. דערווייל איז ארויפגעלייגט געווארן א שטרענגע פארבאט צו פובליצירן די נעמען פון די סוספעקטס אדער דעם נאמען פונעם דעיקעיר. די קלאגעס זענען נאך אלס אונטער אויספארשונג און קיין שום לעגאלע אורטייל איז דערווייל נאכנישט געמאכט געווארן.