פאליציי נוצט שטעקענעס קעגן פראטעסטירער ביי א הפגנה אין ירושלים
גאלערי
ווידעאס
בס"ד
פאליצייאישע ברוטאליטעט ביי גרויסע מחאה קעגן גזירת הגיוס ביים אריינגאנג צו ירושלים
שוידערליכע ווידעא קליפס זענען פארשפרייט געווארן וואס צייגן ווי פאליציי אפיצירן שלאגן מוחים מיט שטעקנס מיט אן אכזריות, דורכאויס א גרויסע הפגנה קעגן גזירת הגיוס וואס איז פארגעקומען דאנערשטאג אין ירושלים.
די הפגנה איז פארגעקומען נעבן דעם אריינגאנג צו ירושלים, וואו מאסן אידן האבן זיך פארזאמלט צו פראטעסטירן קעגן די פרישע ארעסטן פון ישיבה בחורים איבער די ביטערע גזירת הגיוס.
ווען די פאליציי האט פרובירט צו עפענען די פארשפארטע גאסן, האבן אויסגעבראכן שווערע קאנפראנטאציעס צווישן די אפיצירן און די מוחים. אין די ווידעא רעקארדירונגען פונעם סצענע קען מען זען ווי די פאליציי נוצט שטעקנס צו שלאגן די פארזאמלטע, און באריכטן געבן אן אז זיי האבן אויך גענוצט 'הלם גראנאטן' (סטאן גרענעידס) צו צעטרייבן דעם ציבור.
די מאסיווע הפגנה האט אנגעמאכט שווערע טראפיק און כאאס ביים אריינגאנג צו די שטאט. אין די זעלבע צייט זענען אויך פארגעקומען נאך הפגנות אין די בני ברק געגנט, וואו טיילן פון כביש 4 זענען געווארן אפגעשפארט דורך די מוחים.
די פרישע כוואליע פון הפגנות קומט נאכדעם וואס עס זענען פארגעקומען פרישע ארעסטן פון בני ישיבות, וואס האט געפירט צו א רוף פאר ברייטע פראטעסטן און מערכות איבער'ן לאנד.