צוויי ארעסטירט נאכדעם וואס פאליציי דעקט אויף א טעראר פלאט קעגן די אידישע קהילה אין מאנטשעסטער
גאלערי
ענגלאנד: פאליציי ארעסטירט צוויי פארשוינען וואס האבן געפלאנט א טעראר אטאקע קעגן די אידישע קאמיוניטי אין מאנטשעסטער
בריטישע קאנטער-טעראריזם פאליציי האבן ארעסטירט צוויי מענער אלס טייל פון א ברייטע אויספארשונג איבער א פארדאכט פון א טעראריסטישע פלאן וואס האט געצילט די אידישע קאמיוניטי אין מאנטשעסטער.
די צוויי פארשוינען, ביידע אין די דרייסיגער יארן, זענען ארעסטירט געווארן זונטאג, סעפטעמבער 20, אויף ניוטאן סטריט אין צענטראל מאנטשעסטער, אונטער די לאקאלע טעראריזם געזעץ. זיי זענען אפגעפירט געווארן צו א פאליציי סטאנציע אין לאנדאן, וואו זיי געפינען זיך ווייטער אין ארעסט בעת די אויספארשונג גייט אן.
וויקי עוואנס, א הויכראנגיקע באאמטע ביי די קאנטער-טעראריזם פאליציי, האט געזאגט אז די ארעסטן זענען געקומען נאך א לאנגע און גרונטליכע אויספארשונג, און די אויטאריטעטן גלייבן אז זיי האבן באוויזן צו פארהיטן און צושטערן אן אטאקע קעגן די מאנטשעסטער אידישע קאמיוניטי.
די ארעסטן זענען דורכגעפירט געווארן אין די יעצטיגע ימים נוראים טעג, קורץ פאר יום כיפור. די פאליציי האט ארויסגעברענגט אז זיי פארשטייען די זארג וואס דאס קען ברענגען פאר די אידישע קהילה, און האבן באטאנט אז קאנטער-טעראריזם אפיצירן ארבעטן אינאיינעם מיט די 'גרעיטער מאנטשעסטער פאליציי' און אנדערע אגענטורן צוצושטעלן פארמערטע פאטראלן און עקסטערע זיכערהייט שוץ פאר די אידישע געגנטער.
אלס טייל פון די זעלבע אויספארשונג, האבן אפיצירן דורכגעפירט אבלאוועס און זוכונגען אין הייזער אין סאלפארד און ליווערפול. די פאליציי האט באקומען ספעציעלע ערלויבעניש פון געריכט צו האלטן די צוויי סוספעקטן אין ארעסט ביז סעפטעמבער 27, בשעת די אויספארשער גייען אן מיט זייער ארבעט.
די פאליציי האט קלארגעשטעלט אז דערווייל גלייבן זיי נישט אז עס איז דא א ווייטערדיגע סכנה פארן פובליק אין פארבינדונג מיט די קעיס, אבער זיי בעטן פונעם ציבור צו בלייבן וואך און זיין פארזיכטיג. די אויספארשונג גייט ווייטער אן, און דערווייל זענען נאך נישט ארויפגעשטעלט געווארן קיין אפיציעלע קלאגעס קעגן די צוויי פארשוינען.