ארץ ישראל — צענדליגע חרדישע אידן זענען ארויסגעקומען מיטוואך (אקטאבער 21) פראטעסטירן אינדרויסן פון די כפר סבא פאליציי סטאנציע, נאכדעם וואס א ישיבה בחור איז ארעסטירט און איבערגעגעבן געווארן פאר די מיליטערישע פאליציי צוליב זיין מיליטער-סטאטוס.

לויט באריכטן אין די לאקאלע חרדישע מידיא, איז דער בחור, א תלמיד פון ישיבת 'תורה בתפארתה' אין אלעד, געווען פארמישט אין א קליינע טראפיק אינצידענט א טאג פריער, און די פאליציי האט אים געהייסן אריינקומען צו די כפר סבא פאליציי סטאנציע. אינמיטן באהאנדלען זיין קעיס, האבן די פאליציי אפיצירן נאכגעזוכט זיינע רעקארדס און אנטדעקט אז ער איז ליסטעד אלס א 'משתמט' (איינער וואס האט זיך נישט געשטעלט צום מיליטער). מ'האט אים תיכף ארעסטירט און אריבערגעפירט צו די מיליטערישע פאליציי.

די נייעס איבער דעם ארעסט האט זיך זייער שנעל פארשפרייט אין די חרדישע גאס, און דורך די באקאנטע 'צבע שחור' הוטליין איז ארויסגעגאנגען א רוף פאר די המון עם ארויסצוקומען פראטעסטירן. ביז א קורצע צייט זענען צענדליגע פראטעסטירער אנגעקומען צום פאליציי סטאנציע אין א פרואוו צו אפהאלטן זיין טראנספער, אבער ס'איז שוין געווען צו שפעט און ער איז שוין געווען אין די הענט פון די מיליטער.

די פראטעסטן האבן זיך דערנאך אריבערגעצויגן צו די דערנעבנדיגע גאסן און צום רעננה דזשאנקשאן אויף הייוועי 4, וואו די פראטעסטירער האבן זיך געזעצט אויף דער ערד, בלאקירט דעם טראפיק און זיך קאנפראנטירט מיט די פאליציי.

די פאליציי האט דערקלערט דעם פראטעסט אלס אומלעגאל און אראפגעברענגט כוחות צו צעטרייבן דעם ציבור און צוריק עפענען די הייוועי. אין ווידעא קליפס וואס זענען פארשפרייט געווארן פון די סצענע קען מען זען ווי פאליציי אפיצירן רייסן זיך מיט די פראטעסטירער, און שלעפן אוועק מענטשן וואס זענען געזעסן אדער געלעגן אויפן ראוד.

דערווייל ווערט איבערגעגעבן אז עסקנים זענען אריינגעטאן אינעם קעיס, און דער אדוואקאט שלמה חדד ארבעט שווער ארויסצובאקומען דעם בחור פון די מיליטערישע תפיסה. דער אינצידענט קומט אין א צייט פון אנגעצויגנקייט און כסדר'דיגע פראטעסטן איבער גאנץ ארץ ישראל איבער דעם ענין פון ארעסטירן ישיבה בחורים וואס שטעלן זיך נישט צום מיליטער.