אינטערעסאנטע סצענע אין קרית יואל: א גרופע מתפללים געזען זאגן 'ספרד'ישע סליחות' אין חודש אלול

אן אינטערעסאנטע בילד האט זיך אפגעשפיגלט די וואך אין די חסידישע שטאט קרית יואל, ווען א גרופע מתפללים זענען געזען געווארן זאגן "ספרד'ישע סליחות", אריינברענגענדיג דעם באקאנטן ספרד'ישן מנהג פון חודש אלול אין צענטער פון די סאטמארע קהילה.

א ווידעאו וואס איז פארשפרייט געווארן דעם דאנערשטאג צייגט ווי מענער און קינדער זענען זיך צוזאמגעקומען אויף סליחות אין קרית יואל, מיט א קעפשען וואס ליינט זיך: "ספרד'ישע סליחות היינט אין קרית יואל". ווי באקאנט, אנדערש ווי ביי אשכנזי'שע קהילות וואו מען הייבט אן צו זאגן סליחות ערשט עטליכע טעג בעפאר ראש השנה, פירן זיך די ספרד'ישע אידן אנצוהייבן זאגן סליחות גלייך אנהייב חודש אלול, און מען זאגט דאס יעדן טאג דורכאויס דעם גאנצן חודש.

כאטש די שטאט קרית יואל איז באקאנט אלס אן אבסאלוט חסידישע שטאט, געפינט זיך דארט אויך אן עסטאבלירטע ספרד'ישע קהילה. דער ספרד'ישער בית המדרש, וואס טראגט דעם נאמען "קהל שערי בית יוסף - בית מדרש ספרדים", געפינט זיך אויף ישראל זופניק דרייוו אין שטאט, און באדינט די לאקאלע ספרד'ישע איינוואוינער וועלכע האלטן אן זייערע מסורה'דיגע מנהגים צווישן די חסידישע איינוואוינער.