ניו יארק סיטי היימ-אייגנטומער און לענדלארדס ווערן דערמאנט איבער א נייע זיכערהייט געזעץ וואס וועט אריינגיין אין קראפט דעם 1'טן יאנואר 2027, וואס וועט פאדערן צו אינסטאלירן 'נעטורעל גאז' דעטעקטארס אין רעזידענטשעל געביידעס איבער די פינף באראס.

די ניו יארק סיטי דעפארטמענט אוו בילדינגס (DOB), אינאיינעם מיט אנדערע שטאטישע אגענטורן און יוטיליטי קאמפאניס, האבן אנגעהויבן א פובליק קאמפיין צו אינפארמירן פראפערטי אייגנטומער און איינוואוינער איבער דעם קומענדיגן דעדליין. די נייע פאדערונג קומט ארויס פון 'לאקאלע געזעץ 157', וואס איז געווארן איינגעשטעלט צו פארשטארקן די שוץ קעגן געפארפולע גאז רינענישן (ליעקס) אין רעזידענטשעל פראפערטיס.

אונטער די נייע רעגולאציעס, מוזן אייגנטומער פון געביידעס וואס האבן גאז פייפס זיכער מאכן אז באשטעטיגטע גאז דעטעקטארס זענען געהעריג אינסטאלירט. די געזעץ נעמט ארום א ברייטע רייע פון רעזידענטשעל פראפערטיס, אריינגערעכנט פריוואטע הייזער און אפארטמענט בילדינגס.

אנדערש ווי די געווענליכע סמאוק און קארבאן מאנאקסייד אלארמס, זענען די נייע דעטעקטארס ספעציעל דעזיינט צו דערשפירן א רינעניש פון נעטורעל גאז. דאס גיט אן עקסטערע ווארענונג וואס קען העלפן איינוואוינער עוואקואירן די געביידע בעפאר א געפארפולע סיטואציע אנטוויקלט זיך. די אייגנטומער מוזן זיכער מאכן אז די אפאראטן טרעפן זיך מיט די נויטיגע זיכערהייט סטאנדארטן און זענען פלאצירט לויט די פארשריפטן.

שטאטישע באאמטע בעטן די פראפערטי אייגנטומער נישט צו ווארטן ביזן לעצטן מינוט פונעם דעדליין צו מאכן די נויטיגע איינריכטונגען. די דעפארטמענט אוו בילדינגס האט אויך ארויסגעשטעלט אנווייזונגען וואס ערקלערט די אינסטאלאציע פאדערונגען און די פליכטן פון די בילדינג אייגנטומער.

אלס טייל פון די קאמפיין, האט די שטאט געמאלדן אז עס וועלן זיין געלעגנהייטן פאר קלענערע פראפערטי אייגנטומער וואס זענען בארעכטיגט דערצו, צו באקומען בחינם'דיגע גאז דעטעקטארס ביי ספעציעלע עווענטס, לויט וויפיל עס וועט זיין אוועילעבל.

די נייע רעגולאציעס וועלן אפעקטירן רעזידענטשעל פראפערטיס איבער גאנץ ניו יארק סיטי, אריינגערעכנט די היימישע געגנטער ווי וויליאמסבורג, בארא פארק, פלעטבוש, קראון הייטס, און אנדערע קהילות איבער די פינף באראס.

איינוואוינער וואס האבן א חשד אויף א גאז ליעק ווערן געראטן צו פארלאזן דעם ארט זאפארט און רופן 911 פון א זיכערע פלאץ. פראפערטי אייגנטומער קענען איבערקוקן די אפיציעלע פאדערונגען און פרישע אנווייזונגען אויף די וועבזייטל פון די ניו יארק סיטי דעפארטמענט אוו בילדינגס.