בס"ד

אנגעצויגנקייט אינעם מערב ברעג: פרישע קאנפראנטאציעס צווישן מתנחלים און פאלעסטינער אין א דארף נעבן ראמאללא

באוואפנטע אידישע מתנחלים זענען אין די לעצטע טעג עטליכע מאל אריינגעקומען אינעם פאלעסטינער דארף 'אל-מוגייר' נעבן ראמאללא, וואס האט געפירט צו א רייע קאנפראנטאציעס און עטליכע פארוואונדעטע. ווידעא קליפס צייגן ווי די מתנחלים דרייען זיך ארום אין די געגנט באגלייט דורך צה"ל זעלנער.

די אומרוען האבן זיך אנגעהויבן פרייטאג, אוגוסט 28, ווען באוואפנטע מתנחלים זענען אריינגעקומען אינעם דארף אינאיינעם מיט צה"ל קרעפטן. לויט באריכטן, זענען צוויי פאלעסטינער איינוואוינער געשאסן געווארן דורך צה"ל זעלנער בשעת זיי האבן פרובירט זיך קעגנצושטעלן די מתנחלים. די פאלעסטינער נייעס אגענטור WAFA האט באריכטעט אז די איינוואוינער האבן באשולדיגט די מתנחלים אין פרובירן צו גנב'ענען זייערע שאף, און עטליכע בהמות זענען געשאסן געווארן דורכאויס די געפענגענישן. די אגענטור האט אויך באשולדיגט אז די מיליטער האט צוריקגעהאלטן אן אמבולאנס פון אנקומען צו די פארוואונדעטע. די צה"ל האט דערווייל נישט רעאגירט צו די באריכטן.

די געוואלדטאטן האבן זיך ווייטער געצויגן דורכאויס דעם וויקענד. שבת האט דער הויפט פונעם דארף'ס קאונסיל איבערגעגעבן אז מתנחלים, באגלייט מיט מיליטער, זענען נאכאמאל צוגעקומען צום דארף, פרובירט אריינצודרינגען אין א הויז און אריינגעברענגט זייערע אייגענע שאף אין די געגנט. לויט באריכטן האבן די זעלנער געשאסן טרערן-גאז דורכאויס די צוזאמענשטויסן מיט די ארטיגע איינוואוינער.

זונטאג פארנאכטס האט אויסגעבראכן א פרישע קאנפראנטאציע. פאלעסטינער מעדיצינישע באאמטע האבן באריכטעט אז פיר מענטשן זענען פארוואונדעט געווארן פון שארפע קוילן ווען מתנחלים זענען ווידער אריינגעקומען אינעם דארף. עס איז דערווייל אומקלאר ווער עס האט געשאסן; טייל פאלעסטינער באריכטן געבן אן אז די מיליטער האט געשאסן, בשעת אנדערע זאגן אז די מתנחלים האבן געעפנט פייער.

מאנטאג האט די 'הארץ' צייטונג באריכטעט אז צוויי מינדעריעריגע זענען צווישן די פארוואונדעטע, און אז די מתנחלים האבן שפעטער ארומגערינגלט א הויז און צוגענומען עקוויפמענט פון די הויף.

די אינצידענטן אין אל-מוגייר קומען אין א צייט פון א ברייטערע כוואליע פון געוואלדטאטן דורך מתנחלים איבערן מערב ברעג, וואס האט ארויסגערופן ערנסטע זארג ביי די מדינת ישראל זיכערהייט אגענטורן. לעצטיגע באריכטן צייגן אז הויכראנגיקע מיליטערישע און שפיאנאזש באאמטע האבן מורא אז די אנגייענדע אטאקעס קענען פירן צו א פיל ברייטערע עסקיליראציע אין די ראיאן.