רירנדע און ערשטמאליגע ׳מסיבת אודה השם׳ אפגעראכטן געווארן דורך ׳אודה׳, וואו עס זענען זיך צוזאמגעקומען הונדערטער עסקנים, נדבנים ונגידי עם וחולים שנתרפאו ומשפחתם, צו דאנקן אויף די געוואלדיגע פעולות שע״י אודה

רייכע און עלעגאנטע מעמד פארגעקומען אינעם מלון האטעל, אהערגעשטעלט דורך די בארימטע ״פראדזשעקטער גרופע״ אין שפיץ פון מייסטער-קאמפיין סטראטעגיסט ר׳ אהרן עהרנטאל צוזאמען מיט זיין שותף ר׳ אייזיק מאשקאוויטש, אינאיינעם מיט די פינעקס טיעם.

דעם פארלאפענעם זונטאג נאכט האט זיך אנטפלעקט פאר די אויגן אן ערשטמאליגן און חידוש׳פולן מעמד אינערהאלב די ראמען פון אודה, ווען הונדערטער עסקנים, נגידים בעם און אידן און פאמיליעס וועלכע זענען אויפגעראכטן געווארן מיט׳ן לעבן דורך אודה, זענען זיך אינאיינעם צוזאמגעקומען אינעם פראכפטפולן מלון האטעל, פאר א רייכע נאכט אפצורעכטן א שבח והודאה פאר׳ן אייבערשטן, פאר די וועלטס-גרעסטע דאקטוירים און פאר די עסקנים ונגידים וועלכע ערמעגליכן די אומגלויבליכע פעולות פון אודה.

די מעמד איז איינגעלייטעט געווארן דורכ׳ן בארימטן פה מפיק מרגליות ר׳ מאיר מרדכי בערקאוויטש שליט״א, וועלכע האט אריינגעברענגט דעם פיל-קעפיגן עולם אינעם מסבית הלילה, און ארויסגעברענגט אויפן שפיץ גאפל די הייליגע און אומגעווענליכע פעולות פון אודה, וועלכע טוט שטילערהייט גראבן טיפע וואסערן פאר קרוב צו צוועלף יאר, און האט אין די צייט געראטעוועט הונדערטער אידן ממוות לחיים, דורכ׳ן זיי באגלייטן און ברענגען די ריכטיגע צוגעפאסטע דאקטוירים און ארגאנען, צו קענען ממשיך זיין מיט א נייע לעבן.

דאן איז אויפגערופן געווארן איינס פון די גרעסטע דאקטוירים וועלכע האט געדינט אלס דירעקטער אין קאלאמביע שפיטאל-נעץ, און פארפיגט פאר לאנגע יארן אויף די קאמפליצירסטע טראנספלענטס, און ארבעט האנט ביי האנט מיט אודה, דר. קאהן, וועלכע האט ערהאלטן א באעהרונג און דערנאך ארויסגעברענגט זיין נאענטע צוזאמענארבעט און אומגלויבליכע פארשטאנד וואס מרת עסטרייכער און די גאנצע אודה טיעם פארמאגן צו יעדע קעיס, צו פארשטיין און ארויסהאבן דאס וואס די גרעסטע דאקטוירים קענען צומאל פארזען, און אין די זעלבע צייט באגלייטן די חולים מיט אן אויסטערלישן הארץ און פארשטאנד.

שטארקע און קלארע רייד זענען געהערט געווארן דורך ר׳ אהרן עהרנטאל, דער מייסטער סטראטעגסיט אין גראנדיעזע קאמפיינס דורך ׳פראדזשעקטער׳, וועלכע האט פארגעלייגט די קלארע פלאן און עתיד פון אודה, וויאזוי עס וועט בס״ד פארזיכערט ווערן איר עתיד און גלאררייכע פעולות פון הצלת נפשות.

דער קלימאקס פונעם נאכט איז געווען א רירנדע פרעזענטאציע און שמועס צווישן הרב יואל עסטרייכער שליט״א, מנהל ומייסד, אינאיינעם מיט א העראאישע לעבער-דאונער און מיט׳ן טאטע פון די קליין קינד וועלכע האט ערהאלטן דעם לעבער. די מעמד איז אנגעפירט געווארן דורכ׳ן בארימטן שריפטשטעלער הרב פנחס לייפער, און האט געברענגט טרערן אין די אויגן ביי די פארזאמלטע, ווען החוט המשולש לא במהרה ינתק, און מען האט געהאט די געלעגנהייט בייצואוואוינען פון דער נאענט די גאנצע השתלשלות פון א געווענליכע קעיס אינערהאלב אודה.

די הונדערטער באטייליגטע האבן פארלאזט די האטעל אין די שפעטע נאכט שעות, מיט געמישטע געפילן פון פרייד און שמחה אויף די הונדערטער חולים שנתרפאו כבר, און אין די זעלבע צייט מיט א תפילה און געבעט צום רבוש״ע אז די פעולות זאלן ווייטער קענען אנגיין, און אודה זאל ממשיך זיין ראטעווען די הונדערטער חולי ישראל וועלכע ווארטן נאך אויף א ישועה.

בילדער קרעדיט: שלום שווארץ