אראפצונעמען דעם ביאור הלכה און מכתבים איבער דעם ענין, דורך די גדולי הפוסקים לאיסור, דרוקט דא 

מעלדונג פונעם מערכת:  די ענין איז זייער א פארצווייגטע, עס זענען דא גדולי הפוסקים לאיסור ולהיתר, און דאס וואס איר זעהט אויף א וועב זייטל זאל ח"ו נישט מאכן אייער באשלוס אויף אזאנע האקעלע ענינים,  נאר יעדער זאל אנפרעגן ביי זיין דעת תורה איבער דעם ענין.

נ.ב האבן מיר האבן ארויפגעלייגט דעם ארטיקל ע"פ הוראות הרבנים  . 

בארא פארק – גאר א היסטארישע און שטורמישע אסיפת רבנים איז פארגעקומען דאנערשטאג מיטאג לסדר 'וה' אתנו אל תיראום' [שלח] שנת תשפ"ה לפ"ק, וואו עס זיך צוזאמגעקומען תחת קורת גג אחד העכער 80 רבנים וגדולי ההוראה פון כמעט אלע שיכטן און קרייזן פון כלל ישראל, אינאיינעם דן צו זיין איבער גאר א קריטיש און וויכטיגן נושא בהלכה וואס איז נוגע לקדושתן של ישראל, וואס איז גע'אסר'ט געווארן דורך די גדולי הרבנים ועמודי ההוראה פון די פריערדיגע דורות, און וויבאלד עס זענען אין די לעצטע תקופה געהערט געווארן פארשידענע צדדי היתר, האבן די גדולי הרבנים ומנהיגי עדת ישורון געשפירט פאר וויכטיג צוזאמצוברענגן די רבנים ומורי ההוראה ויושבי על מדין כדי איבערצוגיין דעם נושא און מחזק זיין דעם איסור כדי לגדור גדר אין די ענינים החמורות שבחמורות.

עס איז געווען אן ערהאבן בילד צו זעהן ווי דער זאל פון אנשי ספרד – וואס האט געהאט די זכי' צו זיין די אכסניא של תורה פאר דעם היסטארישן אסיפה – האט זיך כסדר אנגעפילט מיט חשוב'ע רבנים וגדולי ההוראה פון פילע קהלות קדושות אין כלל ישראל, וועלכע זענען אלע זיך צוזאמגעקומען פאר איין איינציגן ציל: לחזור ולשנן מסורת רבותינו עמודי ההוראה שבדור הקודם, איבערצו'חזר'ן און באפעסטיגן די יסודות פון קדושתן של ישראל וואס אונזערע פריערדיגע גדולי ישראל האבן אוועקגעשטעלט כיתד שלא תמוט, און דאס אנהאלטן אויף ווייטער מיט אן אומבויגזאמקייט בלי שום שינוי.

במשך די גאנצע צייט זענען די חשוב'ע רבנים ודיינים געזעצן מיט א געוואלדיגן ערנסטקייט, וויסנדיג דעם גרויס אחריות וואס ליגט אויף זיי ווען מען איז דן איבער די הארבסטע ענינים בקדושתן של ישראל, און גלייכצייטיג האט געהערשט אן אטמאספערע פון אחדות און שלום, ווען דער ציהל איז בלויז ארויסצוזאגן דעם דעת תורה הברורה און מחזק זיין דעם איסור וואס איז געווען אלע יארן אנגענומען מיט א פשטות ביי אלע פריערדיגע רבנים מובהקים, אויף א פארנעם כדת של תורה אהן קיין שום פערעזענליכע אינטערעסן.

די אסיפה איז געעפנט געווארן דורך הרה"ג פה מפיק מרגליות ר' חיים אהרן פריעדמאן שליט"א אבד"ק אמרי אברהם וועלכער האט געניט אנגעפירט דעם גאנצן מעמד, דער חשוב'ער יושב ראש האט ארויסגעברענגט די מטרה פון די אסיפה אז מען איז געקומען דא דן זיין איבער ענינים וואס זענען חמורות שבחמורות אין כלל ישראל און עס רעדט זיך דא פון חששות בעניני ממזרות רח"ל, וואס די אלע שאלות זענען ביז יעצט געווען אנגענומען קלאר לאיסור ביי אלע רבנים מובהקים, און אצינד קומט מען זיך צוזאם איבערצוגעבן אויף ווייטער דעם קלארן דעת תורה וואס מיר האבן מקבל געווען פון די פריערדיגע און  דערמיט מחזק זיין די גדרים וסייגים למען קדושתן של ישראל.

ביים אנפאנג פון אסיפה האט דער יו"ר שליט"א איבערגעגעבן א וויכטיגן שליחות בשם דעם ביד"צ העדה החרדית אין ירושלים, וואס האבן א טאג בעפאר אפגעהאלטן א מושב בי"ד וואס בראש ההרכב איז געזעצן הגאון האדיר ר' אברהם יצחק אולמאן שליט"א חבר הביד"ץ, און זיי זאגן אז דער בית דין האט שוין קלאר ארויסגעברענגט דעת תורתם לאיסור און האבן גארנישט וואס מוסיף צו זיין, נאר לרגל די אסיפה ווילן זיי איבערגעבן א ספעציעלע באגריסונג און ברכה אז זיי זענען גאר שטארק מחשיב דאס וואס די רבנים ועמודי ההוראה פון יהדות החרדית בארה"ב שטעלן זיך ארויס למען טהרתן של ישראל, און זיי וואונטשן אן אלע רבנים הנאספים אז מען זאל מצליח זיין צו ראטעווען אידן פון מכשולות און זעהן סייעתא דשמיא.

דער יו"ר האט צום ערשט ארויפגערופן איינעם פון די גרעסטע מומחים אין דעם פעלד, אויף וועם עס האבן זיך סומך געווען אין אט די האקעלסטע ענינים די גדולי ההוראה מדור הקודם ובראשם כ"ק הגה"צ אבד"ק מאנטעווידעא זצ"ל, הלא הוא העסקן המפורסם הר"ר אהרן שמואל יאקאבאוויטש שליט"א, וועלכער איז אויף א קלארן אופן דורכגעגאנגען די מציאות הדברים און האט איבערגעגעבן די קלארע הוראות לאיסור וואס ער האט מקבל געווען אין דעם ענין פון די פריערדיגע רבנים ופוסקים מובהקים.

דערנאך האט מען געהערט קורצע ווערטער דורך א הוק-אפ פון הגאון הגדול ר' נתן קופשיץ שליט"א רב דקהל נחלה ומנוחה אין בית שמש, וועלכער האט געזאגט אז היות ער הערט אז מען זאגט נאך אלץ בשמו אז ער איז מתיר דעם ענין, וויל ער דא אריינרעדן אין מייק און איבערגעבן קלאר דעת תורתו אז אלע אנוועזענדע רבנים זאלן הערן אז ער האט דאס קיינמאל נישט מתיר געווען! און דערביי האט ער אנגעוואונטשן די רבנים זיי זאלן זוכה זיין לגדור גדר און זאלן ניצל ווערן מכל צרה וצוקה.

דאן האט אויפגעטרעטן דער עמוד ההוראה הגה"צ אבד"ק פריימאן שליט"א ראב"ד התאחדות הרבנים, וועלכער האט זיך אריינגעלאזט אין א לענגערן הלכה'דיגן שמועס וואו ער איז דורכגעגאנגען דעם גאנצן נושא מיט א זעלטענעם קלארקייט פון אלע פוסקים ראשונים ואחרונים, וואס אלע זאגן ארויס דעם קלארן און אומצוויידייטיגן פסק לאיסור.

דערנאך האט מען ווידעראמאל געהערט א הוק-אפ פון ארץ ישראל דורך הגאון הגדול המפורסם ר' משה שאול קליין שליט"א לאנגיעריגער דומ"ץ בבית הוראה פון הגאון האדיר פוסק הדור בעל שבט הלוי זצ"ל, וואס כידוע איז ער געווען דער נאנטסטער מענטש וואס ממש לא זז ידו מתוך ידו רבות בשנים, דער גאון שליט"א האט ארומגערעדט איבער דעם קלארן הוראה לאיסור אין דעם ענין וואס ער מקבל געווען פון רבו המובהק דער בעל שבט הלוי זצ"ל, און איבער די שרעקליכע מכשולות בקדושת ישראל וואס קען ארויסקומען פון מקיל זיין אין אזעלכע ענינים.

דערנאך האט אויפגעטראטן הגה"צ אבד"ק וואלקאן שליט"א וועלכער האט אין אנפאנג בארירט דעם חלק ההלכה, און האט דערנאך ארויסגעברענגט דעם חלק ההשקפה אז אזעלכע האקלע ענינים וואס האנדלט זיך פון די סאמע וויכטיגסטע יסודות פון קדושתן של ישראל דארפן ווערן דורכגעטוהן מיט'ן גרעסטן כובד ראש, און אויב ס'איז אן אחריות משנה צו זיין פון די פריערדיגע דורות אפילו אויף לחומרא, איז א ק"ו אז ס'איז פילפאכיג א גרעסערע אחריות משנה צו זיין אויף אן ענין לקולא ובפרט ביי אזא הארבן ענין וואס די זקני הוראה פון פריערדיגן דור האבן דאס קלאר גע'פסק'נט לאיסור, וואס דעריבער זענען מיר לגמרי נישט בכח מקיל צו זיין אין דעם ענין.

ביים שלוס האט דער יו"ר שליט"א ארויסגעברענגט דעם געדאנק אז די אלע אנוועזענדע רבנים ודיינים זאלן זיך מחזק זיין איינער דעם אנדערן, און ווער עס שפירט אז ער וויל זיך מער אריינלייגן דורכצוטוהן דעם ענין איז אדרבה תבוא עליו ברכה.

דערנאך זענען די חשוב'ע רבנים שליט"א געזעצן א שטיק צייט וואו מען האט צווישן זיך נושא ונותן געווען בדבר, און דאן האבן אלע אנווענזדע פארלאזט די אסיפה מיט אן אנטשלאסנקייט אנצוהאלטן דעם דעת תורה וואס מיר האבן מקבל געווען פון אמאל, און האפנטליך וועט מען ווייטער אפהיטן על גחלת ישראל שלא תכוה ביז מיר וועלן זוכה זיין בקרוב צו די גאולה השלימה בב"א.

רשימת הגאונים והצדיקים רבנים ודיינים שליט"א וועלכע האבן זיך באטייליגט ביי די היסטארישע אסיפה לשם שמים, ואין מוקדם ומאוחר בתורה. [מיר בעטן שטארק אנטשולדיגונג אויב האבן מיר בטעות ארויסגעלאזט א נאמען וכדו' וכבר אמר דוד המלך ע"ה שגיאות מי יבין, ואת כבוד תורתם הסליחה]

כ"ק אדמו"ר מגאלאנטא שליט"א, כ"ק אדמו"ר מבורשטין שליט"א, כ"ק אדמו"ר מפאפא-ב"פ שליט"א, כ"ק אדמו"ר מחוסט שליט"א. הרבנים הגאונים הצדיקים: אבד"ק פריימאן שליט"א ראב"ד התאחדות הרבנים, אבד"ק מגד יהודה שליט"א, אבד"ק וואלקאן שליט"א, דומ"ץ סקווירא ב"פ שליט"א, גאב"ד פאלטישאן שליט"א, דומ"ץ סקווירא ירושלים שליט"א, אבד"ק קארלסבורג שליט"א, אבד"ק קליינווארדיין שליט"א, אבד"ק בעלזא-מאכניווקא וומסב"ג שליט"א אבד"ק היבנוב שליט"א רב דבית החולים מיימאנידעס, אבד"ק קלעסאן שליט"א מרבני קהל יטב לב דסאטמאר וומסב"ג, רבי אפרים שמעון לייכטאג שליט"א דומ"ץ סאטמאר 15, רבי משה קעסלער שליט"א דומ"ץ וראה"כ וויזניץ, רבי מאיר גרינוואלד שליט"א דומ"ץ פאפא בשליחות אביו כ"ק אדמו"ר מפאפא שליט"א, רבי שלו' פסח לאנגסאם שליט"א דומ"ץ בעלזא’ אבד"ק פאלטישאן-פלעטבוש שליט"א, אבד"ק לייפניק שליט"א, רב דקרית הערצאג שליט"א בארה"ק, אבד"ק פרעשבורג שליט"א, אבד"ק בערזשאן שליט"א, אבד"ק קאמעניץ שליט"א, אבד"ק גאלאנטא שליט"א, אבד"ק אוסטילא שליט"א, אבד"ק אמרי אברהם שליט"א, אבד"ק סוואליווע שליט"א, רבי יחזקאל עקיבא גראס שליט"א דומ"ץ בעלזא, רבי מאיר צבי בערגער שליט"א דומ"ץ בעלזא, רבי זושא אויש שליט"א דומ"ץ בהלכה ורפואה בקהל יטב לב סאטמאר, רבי יואל זוסמאן הורוויץ רב דקהל תולדות צבי ספינקא ב"פ בשליחות אביו כ"ק אדמו"ר מתולדות צבי ספינקא שליט"א, רבי יוסף באב"ד שליט"א דומ"ץ וויזניץ מאנסי, ר' חיים דוד קראקעווער שליט"א דומ"ץ גור סטעטן איילענד, רבי אברהם דוד ליווי שליט"א דומ"ץ באיאן ירושלים, רבי ישראל ראזענבערג שליט"א דומ"ץ קהל תורת חיים וויזניץ וומסב"ג, רבי אברהם ישעי' וואזנער שליט"א דומ"ץ בשיכון סקווירא בשליחות אביו הגה"צ ראב"ד סקווירא שליט"א, רבי משה אסטרייכער שליט"א דומ"ץ בבארא פארק, רבי יצחק אהרן גאלדבערגער שליט"א דומ"ץ בקהל פאפא וומסב"ג, רבי דוד לייב פישער שליט"א דומ"ץ בקהל פאפא וומסב"ג, רבי שלו' יעקב גרינשטיין שליט"א דומ"ץ בקהל באבוב-45, רבי מאיר אלי' טייטלבוים שליט"א דומ"ץ טשערנאביל, רבי נפתלי דייטש דומ"ץ בקרית יואל, רבי יואל האלבערשטאם שליט"א דומ"ץ קהל עדת יראים וויען, רבי יעקב מנחם שטייף שליט"א מו"ץ התאחדות הרבנים, רבי חיים משה רוקח שליט"א דומ"ץ בבי"ד אבני שיש פאלטישאן, רבי חיים אלעזר עסטרייכער שליט"א דומ"ץ בית תלמוד להוראה, און נאך אנדערע.