זונטאג האט די מנהל המוסד הרב שלמה באכנער שליט"א אינאיינעם מיט ראשי עסקני בוני עולם פון שיכון סקווירא אפגעשטאט בקודש פנימה פון כ"ק מרן אדמו"ר מסקווירא שליט"א לרגל דאס עפענונג פון די נייע 'בוני עולם אפיס - סניף שיכון סקווירא' צוזאמען מיט רבני מפעל 'אורחות חיים' דחסידי סקווירא, ווי מ'האט ממנה געווען איינע פון די חשובע מדריכי המפעל אלץ דער בוני עולם קאונסלער. דער רבי שליט"א האט זיך שטארק נאכגעפרעגט ביי ר' שלמה איבער די גרויסע פעולות פון בוני עולם, און די שטארקע אויפטוהונגען די לעצטערע יארן, און דערביי גאר ווארים אנגעוואונטשן די נייע קאונסלער מיט די עסקנים אז מען זאל האבן ווייטער סייעתא דשמיא אין די עבודת הקודש אין אלע פעולות נשגבות. די רבי שליט״א האט זיך אנגערופן מיט א סכום הגון זאגענדיג אז פאר אזעלכע פעולות קומט זיך באמת אסאך מער.  דערנאך איז מען אריבער צו הגה"צ דומ"ץ סקווירא שליט"א וואס וועט אינאיינעם מיט די רבני בוני עולם און אורחות חיים האבן א עינא פקיחא אויף אלע ענינים פאר די נייע אפיס. תושבי שיכון סקווירא זענען איינגעהילט אין גרויס התרגשות לקראת דעם נייעם הרחבת גבולי הקדושה פון בוני עולם בתוככי קרתא דשופריא שיכון סקווירא.