דעם פארגאנגענעם מוצאי שבת קודש פרשת וישב - ליל ערב חנוכה האבן חסידי סערדאהעלי, הורי ויוצאי הישיבה, ידידים ותומכים, ובראשם אדמורי"ם ורבנים, זיך אינאיינעם צאמגענומען תחת קורת גג אחד כולם נקבצו ובאו לך לשמוע את דבר השם למלאות רצון צדיק ולהתקשר בעץ החיים דורכ'ן אוועקשטעלן די ווייטערדיגע עקזיסטינץ פון ישיבת סערדאהעלי המתנוסס לתפארה בבת עינו וחמדת לבבו האדמו"ר מסערדאהעלי ביים יערליכע דינער לטובת די ישיבה - "קשר מחזיקים", די גרויסארטיגע מעמד איז פארגעקומען ברוב פאר והדר במקהלות עם רב אין די ליפשיץ זאלן.

צום באשטימטע צייט האבן די ציבור איבערגעפילט דעם זאל, וואס איז געווען הערליך צוגערישט כראוי וכיאות לכבוד התורה ומחזיקיה. די באקאנטע יושב ראש הרה"ח ר' מאיר מרדכי בערקאוויטש געפענט די מעמד מיט פאסיגע דיבורים ארויס ברענגענדיג די געוואלדיגע זכיה פון אט די אידן וואס זיצן דא היינט נאכט וואס טוען זיך אנשליסן מיט סכומים הגונים לטובת הישיבה להחיות נפש צדיק צו פארגרינגערן דעם גרויסן עול הישיבה המוטל על צוארו.

בכבוד הראוי האט מען ענטפאנגען די סערדאהעלי רבי וואס איז געקומען מפאר זיין בראש המעמד, ביים ערשיינען אין זאל האט זיך דער רבי באגריסט מיט די פולע אדמו''רים ורבנים אויפ'ן אויבענאן. און מען האט תיכף צוגעטראטן צום התעוררות'דיגן מעמד "ירידת השפע - אמירת ויתן לך", ווען די רבי האט גערעדט קורצע דברי הקדמה איבער דעם גרויסן כח פון אמירת ויתן לך בציבור, און דערביי אנגעהויבן בקול רגש ויתן לך אויפן אלטן נוסח המקובל נאך פונעם גאלאנטא רב זי"ע, און דער גאנצע עולם האט מיטגעזאגט מיט גרויס התעוררות.

דערנאך האט די יושב ראש אויפגערופן די מנהל הישיבה חדב"ן הגה"צ ר' אהרן זלמן יונגרייז שליט"א וואס האט אויפגעטראטן מיט פלאם פייערדיגע ווערטער מיט א לעבעדיגע גרוס בין כותלי הישיבה מידי יום ביומו, ווי די קרוב צו צוויי הונדערט תלמידי הישיבה טוען שטייגן בתורה ויר"ש אויפן אמאליגע שטייגער ווייט פון די היינטיגע גאס, תחת נשיאתו והדרכתו פונעם רבי שליט''א וואס טוט משפיע זיין אויף די תלמידים הקרויים בנים.

דערנאך האט אויפגעטראטן דעם געטרייע מנכ"ל הרה"ח ר' יהושע יואל קריינדלער הי"ו וואס האט איבערגעגעבן א דעטאלירטע באריכט מטעם הנהלת הישיבה מיט די ווייטערדיגע פלענער פון הרחבת גבולי הקדושה, און די אומגעהויערע באדזשעט וואס מ'האט אריינגעטרויטן אין שנת תשפ"ו, און דערביי אפעלירט צום עולם צו קעגן קומען מיט גרעסערע סכומים להחזקת הישיבה.

דערנאך האט אויפגעטראטן די נואם הכבוד דעם וועלט בארימטע מגיד מישרים הרה"ג ר' שלום שרגא פאפלאנאש שליט"א וואס האט געהאלטן די עולם געשפאנט מיט א העכסטע אינטערסאנטע דרשה, מתובל מראשונים ואחרונים איבער די גרויסקייט פון החזקת התורה.

צום הויכפונקט פונעם נאכט האט מען געהאט די זכיה צו הערן די משא המעמד, דברי אלוקים חיים פונעם ריש מתיבתא קדישא כ"ק אדמו"ר מסערדאהעלי וואס האט משמיע געווען דברות קודש, געבויעט אויף די מסורה פון די דריי פסוקים הרימותי בחור, הרימותי ידי, הרימותי קולי, אז די ישיבה איז ב"ה אויסגעשטיגן צו א מקום תורה ווי יעדע בחור שטייגט מעלות רמות בתורה ויר"ש, און דאס קען נאר צושטאנד קומען דורך די חשובע נדיבים בעם די מחזיקי תורה וואס האלטן דאס אונטער, און צוגענדיגט מיט ווארימע ברכות הקודש פאר די אלע תומכים ומסייעים.

דערנאך האבן די נגידי ותומכי המוסדות זיך געשלענגעלט אין די שורות א לענגערע צייט איבער צו געבן די שטר שותפות קשר מחזיקים מיט די סכומים אדירים ווי רבינו שליט"א האט יעדעם געוואונטשען ברכת קדשו במאור פניו און פארטיילט א מתנת קודש כאות הוקרה, הייליגע ליכט צינדערס וואס ליגט אריין געמישט פון די שיירי הנרות פון ליל יום כיפור און פונעם שמש ליכט מיט וואס דער רבי האט זיך באנוצט די לעצטע יאר חנוכה.

די מעמד האט זיך געשלאסן מיט א געואלדיגע הצלחה אריין ברענגענדיג אסטראנאמישע סכומים לטובת די ישיבה.

דורכאויס די דינער האט זיך אנגעזען די השתתפות פון פילצאליגע אדמורי"ם ורבנים, צווישן זיי האדמורי"ם מסקולען, ווערדאן, ראפשיץ, אוסטילא, והרבנים הגאונים מברעזנא, סאטמאר 15, דומ"ץ סאטמאר ב"פ, ברעזאן, נעפלימיץ, דומ"ץ פאפא ב"פ, אב''ד מראה יחזקאל, ר''י מונקאטש ובן האדמו"ר ממונקאטש, אב''ד תולדות אהרן ב"פ, אב''ד חליסא, אב''ד מאגרוב, אב''ד פאלטישאן, אב''ד סאדאוונא, אב''ד קאלוב, אב''ד תולדות אהרן וומ"ס, אב''ד דזשיבוי, אב''ד קאזעווע, אב''ד קשאנוב, אב''ד ראדמישלא, ר"י שערי יושר און נאך.