*גאר גינסטיגע נייעס נאך יארן פון השתדלות: .*  פאר א משפחה וואס האט א טאטע, זיידע אדער מיטגלידער אין א פעדעראלער תפיסה, ענדיגט זיך די תפיסה נישט נאר ביים טורמע טויער. עס מיינט נאך א שבת מיט אן ליידיגן פלאץ ביים טיש, נאך א יום טוב אפגעטיילט פון א מאן אדער טאטע, נאך א גיין אין שול אליין, א שמחה אדער אנדערע וויכטיגע מאמענטן וואס מען קען בלויז מיטהאלטן דורך א טעלעפאן רוף, אויב עס זענען נאך פארבליבן מינוטן...  עס מיינט אויך די ווייבער וואס בלייבן נעבעך אליין צו דארפן טראגן דעם עול פון אויפציען א משפחה, קינדער וואס בענקען זיך צו הערן זייער טאטע'ס קול, און עלטערן און זיידעס און באבעס וואס ציילן די טעג ביז זיי וועלן ווידער קענען ארומנעמען זייער נאנטע. ווען איין מענטש זיצט אין תפיסה, טראגט די גאנצע משפחה דעם ווייטאג.  די פארגאנגענע וואך האבן די משפחות באקומען א בשורה וואס קען טוישן זייער לעבן און פיל פארגרינגערן.  דער Federal Bureau of Prisons (BOP) האט אנאנסירט א לאנג ערווארטעטע פראגראם פון זיכערע עלעקטראנישע טאבלעטן פאר די ארעסטאנטן אין די פעדעראלע תפיסות. צום ערשטן מאל וועלן זיי האבן צוטריט צו קענען גרינגער שיקן מעסעדזשעס, דורכגיין פראגראמען, ווי אויך רוחניות'דיגע אינהאלט פון שיעורים און דרשות בעז"ה, האלטן חשבון פון די געזונט און "ריענטרי" חשבונות וואס רעכנט ווען מען איז בארעכטיגט אהיימצוגיין פריער, און די גרעסטע פון אלע, אומבאגרענעצטע (ווידיאו) רופן.  פאר צדק איז דאס פיל מער ווי נאך א רעגירונגס אנאנס. דאס איז דער פרוכט פון יארן לאנגע השתדלות.  במשך פון עטליכע יאר האט צדק געארבעט נאנט מיט די באערדע פונעם בּי.או.פּי. צו פארגרעסערן די מעגליכקייטן פאר ארעסטאנטן צו בלייבן פארבונדן מיט זייערע משפחות. איינע פון די גרעסטע צילן איז געווען צו פארברייטן די טעלעפאן מינוטן פאר ארעסטאנטן.  פאראיאר, נאך לאנגע חדשים פון פעילות מיט די דירעקטארס אפיס פונעם בּי.או.פּי., האט דער דעפיוטי דירעקטאר סמיט אויסגעקליבן צדק'ס צוזאמענקום אין וואשינגטאן די.סי. אלס פלאץ וואו צו אנאנסירן די נייע פאליסי צו פארמערן די חודש'ליכע טעלעפאן מינוטן פאר פעדעראלע ארעסטאנטן, א וויכטיגער דערגרייכונג וואס איז געקומען נאך לאנגע השתדלות מצד צדק, דאן פון 300 מינוט א חודש צו 510 מינוט א חודש.  איצט, מיט די נייע טאבלעטן און אומבאגרענעצטע טעלעפאן מינוטן, הייבן זיך די ענדערונגען אויף א גאנץ נייע מדריגה צו ממש אנדערע באגריפן.  במשך פון פילע יארן האבן פעדעראלע ארעסטאנטן געהאט בלויז 300 טעלעפאן מינוט א חודש, ווייניגער ווי צען מינוט א טאג. נאך דער פירסט סטעפּ עקט, די היסטארישע קרימינאל יוסטיץ רעפארם וואס צדק האט במשך פון יארן געהאלפן אנטוויקלען און שטארק פארגעשטופט, איז דאס געשטיגן צו 510 מינוט א חודש. אבער אפילו דעמאלט האבן ארעסטאנטן געדארפט אויסרעכענען יעדע מינוט, טראכטנדיג צי מען זאל שניידן זייער שמועס היינט מיט די משפחה כדי איבערצולאזן אביסל מינוטן פאר מארגן.  יעצט מיט די גאר גינסטיגע דורכברוך פון אומבאגרענעצטע טעלעפאן מינוטן טוישט זיך דעם גאנצן בילד.  א טאטע וועט קענען לערנען גמרא מיט זיין זון, העלפן א טאכטער זיך צוגרייטן פאר א טעסט, הערן ווי דער טאג איז אריבער אין חדר אדער שולע, אדער פשוט אנרופן אהיים צו וואונטשן א גוט שבת, אן דארפן מורא האבן אז די מינוטן וועלן זיך אויסלאזן.  מאן און ווייב וועלן קענען דורכרעדן די חינוך פון די קינדער, צוגרייטן שבת און יום טוב אינאיינעם, מיטלעבן משפחה שמחות, און אפילו זיך באטייליגן אין קענען האבן די צייט צו רעדן איבער שידוכים פאר די קינדער און אנדערע וויכטיגע משפחה ענינים, אלעס בשעת מען האלט שטארק די משפחה קשרים, וואס זענען אזוי וויכטיג פאר די צוריקקער צו די משפחה און חבירים אין די באשטימטע זמן.  אויסער די פארבעסערטע קאמיוניקאציע וועלן די נייע טאבלעטן אויך געבן מער צוטריט צו די פראגראמען, אזוי אויך אריינגערעכנט בּי.או.פי. באשטעטיגטע תורה קורסן וואס ווערט יעצט אויסגעארבעט דורך צדק, אז מען זאל גרינגער קענען האבן צוטריט צו מערערע שיעורי תורה און קענען זיך פארבינדן שטערקער צו די גרעסטע חיזוק די מקור חיים די תורה הק'.  צדק האט שטענדיג געהאלטן און ארויסגעברענגט פאר די אינסטאנצן אז די ענדערונגען ברענגען א תועלת פאר יעדן. שטארקע משפחה קשרים פארבעסערן די זיכערהייט אין די תפיסות, העלפן פארמינערן צוריקפאל אין פארברעכן, און בויען די שטיצע וואס מענטשן דארפן ווען זיי קומען צוריק אהיים. די היינטיגע אנטוויקלונגען אין טעכנאלאגיע און בפרט נאך די אויפקום פון עי.איי. די לעצטע צייט מאכן דאס אלעס מעגליך, בשעת וואס עס טוט גארנישט פארמינערן די פארלאנגטע זיכערהייט.  צדק האט פאריגע וואך עקסטער פארשפרייט א טיפן דאנק פאר די דירעקטאר מר. מארשעל, און דעפיוטי דירעקטאר מר. סמיט, און די פילע געטרייע בּי.או.פּי. באאמטע וואס האבן געארבעט צוזאמען שוין א לענגערע צייט, ווי אסאך האבן מיטגעהאלטן, צו ברענגען די וויכטיגע רעפארמען.  כאטש עס בלייבט נאך אסאך ארבעט צו טון, איז די היינטיגע בשורה גאר א גרויסער שריט פאראויס אין צדק'ס אנגייענדע ארבעט צו פארגרינגערן ווי ווייט מעגליך די פעדעראלע תפיסה סיסטעם, בשעת מען באשיצט דאס וויכטיגסטע פון אלעם, דעם קשר צווישן משפחות, עלטערן און קינדער, די וואס קעמפן יעדן טאג צו בלייבן שטארק טראץ די שווערע שוועריגקייטן פון תפיסה.  מיט א תפילה צום באשעפער אז עד הנה עזרינו ולא עזבינו מען זאל קענען ווייטער העלפן אחב"י בצרה ביז אלע וועלן אויסגעלייזט ווערן בקרוב.